Ka jingai sngewbha ïa ka snam ka dei ban ïarap ïa ki nongpang kiba donkam kyrkieh (MSBTC)

Nongstoiñ, Rymphang 24: Ka jingai sngewbha ïa ka snam ha ki jaka buh snam kiba don ha ki jaka sumar hapoh ka jylla ka long kaba don kam bha namar haduh mynta baroh ki jaka sumar hapoh ka jylla ki dang duna bha ha ka jingdon jong ka snam ha ki jaka buh na ka bynta ban ai sha kito ki nongpang kiba don kam kyrkieh ïa ka snam. Kumta ha kaba ïadei bad katei ka mat kaba donkam ka Meghalaya State Blood Transfusion Council kawei na ki tnad treikam kaba peit ïa ka jingai snam ïa ki nongpang ha ki jaka sumar bapher bapher hapoh ka jylla ha kane ka sngi hat majai ka 24 tarik Rymphang ha ryngkat bad ka jingïatreilang bad ka Blood Centre civil hospital Nongstoiñ ka la pynlong ïa ka program ba kyrpang na ka bynta ban pynshai halor katei ka mat.
Ïa katei ka programe la pynlong ha Bishop Hall New Nongstoiñ ha kaba u Bah Rahnam Jyrwa Assistant Disrector QM Meghalaya State Blood Transfusion Council, ka kong Lugracia. M. Shullai, Doktor E. Wanñiang Transfusion medicine Specialist incharge blood centre civil hospital Nongstoiñ.
Ha katei ka sngi kumba sanphew ngut kiba la ju ai sngewbha ïa ka snam ha ka Blood Centre Civil Hospital Nongstoiñ ki la wan ban sngap ïa katei ka jingpynshai ha kaba ïadei bad ka jingai sngewbha ïa ka snam.
Ha katei ka sngi la ïoh ïa ka jingpynshai na ka kong Lugracia. M. Shullai ha kaba ïadei bad ka jingdon jong ka snam ha ki jaka buh hapoh ka jylla ha kaba ka la ong ba haduh mynta ka snam kaba don ha ki jaka buh ha ki jaka sumar hapoh ka jylla ka dang don haduh katta katta bad haba ki don ki nongpang kiba donkam kyrkieh ym pat lah satia ban pyndap. Nalor kata ka la ong ruh ba haduh mynta ka jylla ka don kam haduh arphewphra hajar unit ka snam na ka bynta ban pynbiang na ka bynta ki nongpang.
Ha kajuh ka por ka la ong ba ka jingïatreilang ka long kaba don kam bha namar ki don bun bah kiba donkam snam kyrkieh kum ha kaba ki jia aksident, kha khunlung bad kiwei kiwei. Ha kajuh ka por la ïoh ïa ka jingpynshai na u Doktor Eric Wanñiang Transfusion Medicine Specialist Blood Centre Nongstoiñ. U Doctor Wanñiang haba pynshai ha katei ka sngi u la ong ba ka jingdon snam ha ka blood centre ha Civil hospital Nongstoiñ ka dang duna haduh katta kata bad haduh mynta dang don tang kumba 20% ka snam kaba la mang na ka bynta ban ai sha kito ki nongpang kiba donkam kyrkieh.
Wat la katta ruh u la ong ba naduh ba ka blood centre ka la don ha Nongstoiñ civil hospital kumba phra spah khatlai ngut ki nongpang kiba donkam snam kyrkieh la ïoh ban ai bad da ka jingdon jong ki ba wan ai sngewbha ïa ka snam ha Nongstoiñ civil hospital Blood centre ka la ong ka jingkyrkhu kaba khraw ïa ki phraspah khatlai ngut ki nongpang namar lada ka snam kam don lypa ha katei ka centre ym lah ban tip kaei ka ban jia ïa kitei ki nongpang.
Ha kajuh ka por u la pynshai ba ïa ki briew kiba dih droks, don jingpang HIV AIDS, Malaria, pangring bad ñiangkulia ym long satia ban shim snam na ki. U la pynshai ruh ba bun ki briew haduh mynta ki dang sngewthuh ba kla ba lada ai snam kan pyntlot noh ïa ka bor ha ka met u briew hynrei kam dei kumta namar shuwa ban shim snam ki doctor ki la eksamin bad peit bniah thik pa thik bad kim ju shim snam klumar lada ki lap ba um long.
Ha kaba ïadei bad kane na ka liang jong u Doktor Wanñiang u la pynshai ruh ba haduh mynta ym pat don satia kano kano ka ri ha ka pyrthei kaba lah ban shna karkhana snam bad ïa u briew ym lah da lei lei ban ai da ka snam mrad kum ki shrieh, ki masi ki blang, ki syiar bad kiwei kiwei lait noh tang da ka snam jong ki para briew.
U la ong ruh ba ka jingai sngewbha ïa ka snam ka long na kabynta ban pynim ïa ki para mynsiem ba kordor namar haba u nongpang u la duna palat ka snam u la don ha tmier ka jingïap. Khatduh eh u la kyntu ïa ki ba ju wan ai sngewbha ïa ka snam jong ki ba kin pynshlur bad pynsgewthuh lem ïa kiwei pat ki bym pat ba ka jingaisngewbha ïa ka snam ka long kaba don kam eh.