Shillong, Nailar 03: Hadien ba ka District Magistrate jong ka East Khasi Hills ka la pynmih ïa ka hukum ban ym shah shuh ban die ïa ki wait, tari ha ki bynta ka Khyndailad bad Jail Road Ka Hynñiewtrep Integrated Territorial Organisation ha ka sngi Balang ka leit ban ïakynduh markhmat bad ka Deputy Commissioner(DC) jong ka East khasi Hills District ka Kong Isawanda Laloo ban ïakren halor kane ka mat.
U President ka HITO u Bah Donbok Dkhar u la ïathuh ba ka seng ka la ai jingmut ba ka DC ba kan thaw noh da kiwei ki lad ki lynti ba kane ka hukum kaba ki la pynmih kan ym pynthut ïa ka lad kamai ja kpoh jong ki nongshong die jingdie ha madan namar bun hi ki dei kiba ym kot bor ban wai dukan.
U Bah Donbok u la ïathuh ba ka HITO ka la ai jingmut ba ka DC kam dei ban khang noh shisyndon hynrei ban ailad ïa ki ban shna noh da ki synduk kiba don ïa ka jingtap da ka jar ne ka ïit khnang ba kan nym long tyngkreiñ eh ha madan ka ba paw kumba juh long.
U la ong ba na ka liang jong ka DC ka la mynjur ïa ka jingkyrpad jong ka seng ban shu shna noh da ki kynja synduk ban thep ïa ki tiar, ki tari ki wait bad kiwei. U la ong ruh ba ki la kyrpad ïa ka DC ba kan phah ktien sha ka sorkar ba pynïoh ïa ka pisa jingïarap khnang ba kine ki nongdie madan kin ïoh pisa ban shna ïa ki synduk.
