Ka jingai ïa ki smartphone kan nang pynbha ïa ki kam shakri ki nongtrei Aganwadi, Conrad

Shillong, Jymmang 27: U Myntri Rangbah ka jylla u Conrad K Sangma ha ka sngi baar u la aiti ïa ki smartphone sha ki nongtrei Anganwadi ha ka prokram kaba la long ha St George Higher Secondary School kaba ha Samanda, East Garo Hills.
Ha kane ka prokram la shim bynta lang da ki nongtrei Anganwadi na ki jaka bapher bapher jong ka East Garo Hills, kiba la ïohpdiang ïa ki smartphone.
U Myntri ka tnat Social Welfare u Bah Paul Lyngdoh bad u Myntri ka tnat PHE u Marcuise Marak ki la ïadonlang ha kane ka prokram.
Haba kren ha kane ka jingïalang u Myntri Rangbah u Conrad Sangma u la ong ba ka jingai ïa ki smartphone kan nang pynbha ïa ki kam shakri jong ki nongtrei Anganwadi.
Lah ban ong ba ka Ministry of Women and Child Development ka la bei pisa kumba T. 6 klur na ka bynta ban thied ïa ki 6,162 tylli ki smartphone na ka bynta ki nongtrei ban kyrshan ïa ki ha ki kam kiba long kiba kongsan bha.
“Ki phone kin long ka jingkieng hapdeng ka digital bad ka jingpynbha ïa ki kam shakri,” ong u Myntri Rangbah.
U Myntri Rangbah u la pyntip ba ïa ka POSHAN App la dep ban install ha ki smartphone, ha kaba ki nongtrei Anganwadi kin pyndonkam ban buh ïa ki data ne jingkheiñ bad ki jingtip bad ba kin lah ban trei ïa kiwei pat ki kam kiba dei ban ai kaiphod, ban pynthikna ha ki kam khmih bniah bad ban pyntreikam ïa ki social welfare scheme.
Ka mobile application kan ïarap ban register ba la pyndonkam da ki nongtrei Anganwadi, bad kane kan kyntiew ïa ki kam jong ki.
U la ïathuh ba ki nongtrei Anganwadi kin ïoh ki jingmyntoi halor ka jinglah jong ki ban khmih bniah manla ka por ïa ka roi ka san bad ka jingkiew ki khynnah haduh ka rta kaba 6 snem da kaba thew ïa ka jingjrong jong ki bad kumjuh ruh ka jingkhia bad ban thep ïa kine ki jingai jingkheiñ hapoh ka POSHAN Tracker.
Ha kane ka prokram u Myntri Rangbah u la sam ruh ïa ki IIT Innovation ECO H2O Filter sha ki Anganwadi center, da kaba thmu ban pynïoh ïa ka umbam umdih sha ki khynnah ha ki thaiñ nongkyndong.
U Myntri Rangbah u la plie ruh ïa ka ïing skul kaba thymmai jong ka St George Higher Secondary School, Samanda, kum ka jingai burom ïa ki khynnah skul bad ban pynpaw ka jingkyrmen ba kan ai mynsiem ha ka kam pule, ka kam ban kyntiew ïa ka roi ka san jong ki.
Ki khynnah skul ka St George ki la ïohpdiang ruh ïa ki M-Tabs (Digital Learn Aid) ha kane ka prokram.