Ka Jengjal Police Station ka dei kawei na ki PS ba bha tam ha ka jylla, ong u Myntri Rangbah

Shillong, Naiwieng 17: U Myntri Rangbah ka jylla u Conrad K. Sangma ha ka sngi Nyngkong u la plie ïa ka Jengjal Police Station building kaba la tei thymmai ha Jengjal, West Garo Hills.
Ïa kane ka prokram la donlang ka Kong Idashisha Nongrang, IPS, Director General of Police, Meghalaya; Abraham T. Sangma, IPS, Superintendent of Police, West Garo Hills; J.F.K. Marak, IPS, Deputy Inspector General of Police (Western Range); Vibhor Aggarwal, IAS, Deputy Commissioner of West Garo Hills; James K. Sangma, Chairman, MIDC; ki heh ophisar ka sorkar, ki pulit bad ki nongshong shnong.
Haba kren ha kane ka sngi u Conrad K. Sangma, u la ong ba ka Jengjal Police Station ka dei kawei na ki police station ba bha ha ka jylla kaba don ha ka jaka kaba biang bha ka ban pynsuk ym tang ïa ki paidbah, hynrei ka ban ïarap ruh ïa ki pulit ban trei kloi ïa ka kam bad u la pynpaw ruh ka jingai khublei ïa u Nokma bad kumjuh ruh ïa ki nongshong shnong kiba la ai ïa ka jaka ban tei ïa kane ka police station. “Ïa kane ka police station la tei da kaba bud ïa ki kyndon ba la buh da ka sorkar pdeng bad ngin pynthikna ba baroh ki police station ha kylleng ka jylla yn sa kyntiew kyrdan, yn pynthymmai ne ban tei ha kata ka rukom ban wanrah ka jinglong kawei ha baroh ki police station,” u la ong.
U la ïathuh ba ha ki por ba mynshwa ka jingdonkam ban pynthymmai ne ban maramot ïa ki police station ka shim ïa ka por kaba jrong bha naba donkam ïa ka jingmang jong ka sorkar wat ha ki kam kiba rit eh kum ka kam airong. “Mynta da ka Police Infrastructure Renovation Fund, ki SP ki lah ban pynthymmai bad ban maramot ïa ki police station khlem da ap ïa ka jingmang naka sorkar jylla,” u la ong. U la pyntip ba lyngba ka Police Infrastructure Renovation Fund kiba bun ki police station la dep ban maramot ne pynthymmai.
U Myntri Rangbah u la pyntip ruh ba ki kam kiba lait ha ka tnat Pulit suki suki la lah ban pyndap. “Ka kam pyndap ïa palat 3000 tylli ki kam kiba lait ka la sdang bad ka la don ha ka kyrdan kaba khatduh bad kata kadei ka personal interview. Lehse kane kan dei ka jingthungkam kaba heh duh ha ka khana pateng jong ka jylla,” u la ong da kaba bynrap ba da kane ka jingthungkam ka jingduna ki nongtrei yn sa lah ban pyndep.
Haba kren shaphang ka Jengjal kum ka jaka kaba kongsan na ka bynta ki paid Garo Hills, u la pynpaw ruh ïa katto katne ki projek kam pynroi na ka bynta ka Jengjal. Haba ïohi ïa ka jingtreikam ba ratbah jong ka tnat pulit ban pynneh ïa ka shongsuk shongsaiñ, u Myntri Rangbah u la pynthikna ïa baroh ki jingkyrshan sha ka tnat. “Nga kmen ruh ban tip lyngba ki jingïalang bishar kam kiba nga la dep ban pynlong bad ka jingbteng ka jingïasyllok hapdeng ka sorkar bad ka tnat,” u la ong.
U la pyntip ruh ba ka sorkar lyngba ka tnat pulit ka dang pyrshang ban pynbiang ïa ki tiar bapher bapher katkum kane ka juk haba pynïaid ïa ka kam cyber, ban pynneh ka shongsuk shongsaiñ bad ki jingpeitngor ka ban pynlong ïa ka jylla kum kiwei pat ki jylla ban ïaryngkat, kumta donkam ban wanrah ruh ki jingkylla.
Haba kut, u Myntri Rangbah u la pynkynmaw ïa baroh ki ophisar bad ki pulit ka tnat ïa ka jinglong kongsan wat la ka dei ka kam kaba eh, u la ong, “Katba phi dang long kiba skhem phim dei ban klet ïa ka jingdonkam ban ïajan bad ki paidbah, ka jinglong isynei sha kiba donkam. Kynmaw ba phi don hangne ban shakri ïa ki paidbah, bad lada ngi bakla kamut ba ngi la bakla la kamram bad ka jingkitkhlieh sha ki nongshong shnong jong ngi.” Katba ka Kong Idashisha Nongrang, IPS, Director General of Police, ka la pynkynmaw ïa ka por ba ka dang shakri ha kane ka thaiñ bad pynkynmaw ïa kiei kiba kala mad ha Jengjal. Ka la ong ba kane ka jingtei ka ïing thymmai ka pyni ïa ka sienjam kaba kongsan na ka bynta ka tnat pulit, kaba kynthup ïa ka general room, lock-up, bad ka kamra officer-in-charge, bad kiwei kiwei.
Ka kong Nongrang ka la pynpaw ka jingai khublei ïa u Myntri Rangbah na ka bynta ki jingkyrshan bad ki kam ba khraw ba la leh na ka bynta ki pulit ka West Garo Hills.
Katba u James K. Sangma, Chairman, MIDC, u la pynpaw ka jingai khublei ïa u Myntri Rangbah ïa ka jingbteng jong u ban kyrshan ïa ka Dadenggre constituency bad ka thaiñ Jengjal.
U James u la ïaroh ruh ba hapoh ka jingïalam ka DGP, ka la don ka suk ka saiñ kaba la jia.
La ïoh ka jingkren pdiang na u J.F.K. Marak, IPS. U la pyntip ruh ba ïa kane ka station la pynbna ha ka 19 tarik u Naitung, 2017.
La ïoh ruh ka jingkren na u Vibhor Aggarwal, IAS, uba la ai ka jingkhublei ïa ki jingnoh synniang u Myntri Rangbah, ki MLA, MDC, bad u Chairman ka MIDC James K. Sangma, bad ai burom ruh ïa ka DGP halor ka shongsuk shongsaiñ.
Ka la don ka jingïalehkai na ki khynnah skul ka St. Anthony’s School, Jengjal, bad ka jingai ïa ka jingtem jingput na ka Rhythm School of Music. Ïa ka prokram la pynkut da ka jingai khublei na Superintendent of Police, West Garo Hills, Abraham T. Sangma, IPS.