Delhi, Nohprah 20 : U Myntri Sorkar Pdeng ba dei khmih ïa ka Tnad Jal Shakti, u C. R. Patil mynta ka sngi u la plie paidbah ia ka ‘Jal Shakti Hackathon–2025’ & Bharat-WIN Portal ha Shram Shakti Bhawan, New Delhi. Kane ka sienjam ka ïahap bad ka jingthmu jong u Myntri Rangbahduh ka ri u Narendra Modi bad ka jingban jur jong u ïa ka ‘Water Vision @2047’ ban pynkhlain ïa ki lad pynbeit lyngba ka saïan bad teknoloji ha ki kam kiba ïadei bad ka um jong ka ri India.
Haba ai jingkren ha ka jingïalang, u CR Patil u la batai ïa ka Jal Shakti Hackathon–2025 kum ka jingïakhih jong ka ri ym kum ka jingïakhun kaba malu mala, kaba la saindur ban pyndonkam ïa ka sap ba ïatylli jong ka ri ban tei ïa ka lawei jong ka um kaba shngain, kaba kynthup ïa baroh bad kaba la pynïaid da ka teknoloji na ka bynta ka ri India .
Ka bha ka miat jong ki Paidbah na ka bynta ka jingïashim bynta ha kylleng ka Ri – Ka Hackathon ka thmu ban kyntiew ïa ka jingsaindur thymmai ha ka kam ba ïadei bad ka um bad ban pynlong ïa ka kum ka jingbha paidbah kaba shisha, kaba lah ban ïoh da baroh kiba don bynta. Ka shim ïa ka rukom treikam jong ka Sorkar Baroh kawei bad ka Imlang Sahlang Baroh kawei (Jan Bhagidari), kaba plie lad ïa ka jingïashim bynta kaba ïar na ki nongshong shnong, ki nongwad bniah, ki karkhana, bad ki nongsaindur thymmai.
La pynlong ha ka https://bharatwin.mowr.gov.in, ka portal ka long shi bynta jong ka rynsan jong ka ri BHARAT–WIN (Water Innovation Network) bad ka ïaleh ban kyntiew ïa ki lad ki lynti kiba lah ban treikam, kiba lah ban pynheh bad kiba la pynkhreh na ka bynta ki jingeh ha kaba ïadei bad ka um ha ki jaka nongkyndong. Kine ki kynthup ïa ka jingpynneh pynsah ïa ka um ha ki jaka rep, ka jinglong ka um ha ki jaka nongkyndong, ka jingpeit bniah kaba kham bha, ka jingkhyllie im biang ïa ki rukom pyndonkam um tynrai, ka jingïada na ka jingshlei um bad ka jingtyrkhong.
Ka sienjam ka pynïar ïa ka jingwad bniah ha ka kam ba ïadei bad ka um bad ka bym sahkut ha tang katto katne ki jaka treikam, kaba pynthikna ïa ka jingïashim bynta kaba ïar na kito kiba don bynta ha kane ka kam kynthup ïa ki Startup, ki MSME, ki Karkhana, ki Scientist, ki jaka pule, ki Laboratory, ki Incubator, ki Samla Nongsaindur, ki Samla ha ki jaka Nongkyndong bad ki longkmie, ki kompeni shimet, bad ki jaka treikam kylleng ka pyrthei.
Ki Bynta ba Kongsan – Ka jingpynlong ïa ki hackathon man ka por bad ka jingkhot na ka bynta ki jingtyrwa halor ki jingthmu ba kongsan jong ka ri kiba ïadei bad ka um. Ka jingpynthikna ïa ka jingai jingmut kaba shai, ka jingbishar bniah, bad ka jingbuddien ïa ki jingmut. Ka ailad ïa ka jingïashim bynta na ki Startup, ki MSME, ki jaka pule, ki karkhana, bad ki nongsaindur thymmai na ka thain shatei lammihngi bad ki karkhana ba ïalam da ki kynthei. Ka Jingkyrshan ïa ka jingsaindur thymmai ba ïatreilang lyngba ka Jan Bhagidari.
Hapoh ka skhim halor ka ‘‘Research and Development Programme in Water Sector and Implementation of National Water Mission’, ka DoWR, RD&GR, MoJS, kin ai jingïarap pisa ha ka dur jong ki grant-in-aid na ka bynta ki jingsaindur thymmai ba la jied.
Ki nongjop ha ka Hackathon kin ïoh ia ka jingïarap pisa kaba T.1 lak na ka bynta ban shna ïa ka Proof-of-Concept (PoC). Ki bynta ba kongsan ki kynthup, ka jingïada ïa ki tyllong um, ka jingpynkhuid ïa ka um jakhlia, ka jingpyndonkam hok ïa ka um, ka ïoh ka kot kaba ïasoh lang, ka bor ban ïaleh pyrshah ïa ka jingkylla ka suinbneng, ka IoT & ki smart water grid, ka rep ka riang kaba thikna, ka jinglum ïa ka um slap, ka jingpynïaid ïa ki wah bad ki jingshlei um, bad ka jingpynwandur ïa ka kam um bad kiwei kiwei.
Ïa ka National Institute of Hydrology (NIH), Roorkee, la jied kum ka Project Implementation Agency (PIA) ban bishar bniah ïa ki jingtyrwa ba la aiti bad ban pynsuk ïa ka jingmynjur jong u Secretary, DoWR, RD&GR.
