Ka jaidbynriew ka mad ïa ka jingeh kaba khraw namar bym don ki nongïalam, ong u Bah Paul Lyngdoh

Shillong Jylliew 29: U MLA ka West Shillong u Bah Paul Lyngdoh uba long ruh u Myntri ka Sorkar u la ong ba ka jingeh kaba khraw kaba ka jaidbynriew ka mad ha kane ka juk kabab mynta kadei ka jingduna ki Nongïalam.
U Bah Paul ula kren ïa kane hynne ka sngi Palei ha ka jingshah pynkup burom ha Ka Synjuk ki Shiphew Dorbar ha ka jingïalang kaba la long ha Dorbar Hall jong ka shnong Lumdiengjri.
“Ngi don ïa ki jingeh kiba khraw ha ka jylla hynrei ka jingeh kaba khrawduh kadei ka jingduna ban don ïa ki nongïalam ha ka jylla” ong u Bah Paul Lyngdoh bad ka bynrap, “Ki don ki nongïalam kiba ïaid ha ka dur jong ki masi ïadur (Sidur) kaba ki briew ki ju leit peit ha ki sngi ìew hynrei ha ki lyngkha pat ki don ki Masi lur (Silur) ïa kaba ym ju don ba peit watla ki trei shitom bha hi ruh”.
“Ka burom kam dei ka jong nga hynrei kadei jongu Blei namar nga la ïaid ha ka lynti kaba eh. Nga ai khublei ïa ki paidbah ba dei namar ka jingieid bad jingshaniah ba ki la pynjop ïa nga Saw sien kum u MLA bad Shisien kum u MDC” ong u Bah Paul.
U la ong, ba ka elekshon ka la kut, ki don kiba kyrshan bad don ruh ki bym kyrshan ïa u, hynrei yn ym kheiñ nongshun ïa ki bym kyrshan hynrei dei ban ïaid noh ha ka lynti jong ka jingshai ban ïakhun pyrshah ïa ki kam sniew khamtam eh ïa u drok ha ka imlang sahlang da kaba ïatreilang ryngkat.
U la ong ruh ba ka long kab i thmmula ban ïohi ba ki don ki katto katne ki party kiba tang lai bnai hadien ba kut ka lekshon ki pynbunkam ïa u paidbah ban pynmih sha jingialng haba u paidbah u la pynkhamti ha ki ban ïasaid ia ïa ka jingeh jong ki.
“Nga ïohi ba don katto katne kiba kam nongïalam kiba tang hadien lai bnai ba kut ka elekshon ki leit kylleng kylleng ban rah placard ban ïakhih ha ka jingshisha dei ban ai lad ïa ka sorkar ban trei ïa ka kam la kumno kumno marshiteng na ka ka por hynrei ki la leit ban pynkhih ïa u paidbah tang khynndiat por ba kut ka elekshon,” u la ong.
U Bah Paul u la ong ruh, ba kum u MLA ula don ïa ki jingthmu ban wanrah ïa ki skhim bad ki projek bapher ha ka Constituency bad yn sa batai bniah bha ïa kine kiei kiei baroh kham hadien.
Ki nongïalam ka Synjuk ki Shiphew Dorbar ki la pynkup burom ïa u Bah Paul Lyngdoh uba la shah jied kum u MLA ka thaiñ bad kum u Myntri ka sorkar jylla.
Ki nongïalam shnong ki la ong, ba ka jingjop u Bah Paul ïa ka elekshon kadei namar ka jingieid jong u paidbah bad ki la pynpaw ïa ka jingkhmih lynti ba u Bah Paul yn theh ïa ki kam pynroi ha ka Constituency khamtam haba u long ruh u Myntri ha ka sorkar jylla bad ki la pynpaw ruh ïa ka jingdonkam ban leh eiei ban wanrah ïa ka jingkhuid jingsuba bad ka jingtynnad jong ki shnong ki thaw ha ka Constituency.
“Ngi kum ki nongïalam shnong ngi sngewkmen ba u Bah Paul u bat ïa ka tnad kaba ïadei bad ka jingeh kaba ki shnong ki thaw ki mad na ka jingjyllei u drok. Ngin ïatreilang ban ïaleh ban rat dyngkhong ïa u drok khamtam eh ban ïoh rat dyngkhong ïa ka jingdie drok naduh na ki tyllong” ong u Secretary ka Shiphew Dorbar u Bah Meban Lyngdoh uba long ruh Rangbah Shnong ka Sunny Hill.
Ki 10 tylli ki shnong kiba don ha ka Synjuk ki Shiphew Dorbar ki kynthup ïa ka Lumdiengjri, Sunny Hill, Jaïaw Langsning, Dymmiew, Mawbah, Lymkshaid, Lower Mawprem, Nongsohphoh, Lama Villa bad ka Qualapatty.