Ka Jaidbynriew ka don hapdeng ka jingma namar ym don shuh ki nongïalam ba tbit: Paul

Shillong, Naitung 02 : Ka Jaidbynriew Khasi Pnar mynta ka don ha ka jingma kaba khraw namar ka jingkyrduh nongïalam ne ym don shuh ki nongïalam kiba tbit ki ban ïakren bad ïasaid ha ïing Dorbar Thawaiñ ka jylla kumba long ha ki phewsnem ba la dep, ong u Bah Paul Lyngdoh, Working President ka UDP ha ka jingïalang pynithuh ïa u Dr. Aman War u ban sa long kum u kyrtong jong ka UDP Shillong North constituency.
Kumta, u ong ba ha kane ka juk ka jingkyrduh nongïalam ki donkam ruh ïa u Dr. Aman ha ka kynhun jong ka UDP namar ki la ïohi ïa ka jinglong ki nongïalam ba mynta ki long kumno. “Ka jingkhyllem jong u Dome ruh ka pyni ïa ka jingkhyllem jong ka jingtbit jongngi ha ka synshar ka khadar. Kane ka jylla kadei kaba sei ïa u Bah Hoover Hynniewta, jong i Bah GG Swell, bah B.B Lyngdoh kumta ter ter. Kum u khynnah samla nga ïohi ïa ka jinglong u nongïalam jong u. Nga kynmaw ïa ka kyntien kaba ong ba donkam ïa ki briew kiba ka bor sngewthuh jong ki ka kham ïar ban ïa kaba ngi ïohi mynta.”
Da kaba kdew ruh ba ka rukom pyrkhat jong ki nongïalam Khasi Pnar ka ïapher wat bad ki nongïalam na rilum Garo, u Bah Paul u ong ba lada kiew u Khasi baroh baroh kiban ïatan. “Peit kumno u Conrad Sangma khlem long MLA u ïoh ban ïalam ïa ka jylla bad haduh ba un da ïoh syndon ban ïalam haduh mynta. Hato don ki nongïalam na rilum Garo ki ban pyrshah ba kumno khlem long MLA u lah ban shimti ïa ka kam nongïalam ha katei ka por. Peit tang arngut shi para ki don ha ka kynhun Myntri, hato ki paralok MLA na rilum Garo ki pynkulmar? Em, kim pynkulmar namar kadei ka rukom jied nongïalam,” la bynrap shuh shuh u Bah Paul.
Shuh shuh u ong ba dei kane ka kynti mynta ba ka Jaidbynriew ka lah ban thaw thymmai pat lym kumta lada ka ïai bteng nangne shakhmat ban shu ïa die ïa thied ïa ki nongthep vote, yn ym don shuh ki briew kiba shemphang bad kiba don ka mynsiem ban shakri ban mih shakhmat ha ka saiñpyrthei.
“Ha kata ka por kaei kaban jia ia ki hep ki jongngi bad ruh ki samla? Wat ym kren tang ïa ka bynta ka lawei hynrei na ka bynta kaba mynta shwa. Ngi la poi sha trai duh bad ym don jaka shuh ban ksaid kham shapoh kumta hap ban kiew shajrong. Kane ka ai jingkyrmen ïa u thniang jong ka jingkyrmen ba un kiew shajrong lyngba ka jingwan jong phi ban long ki nongtrei ba shitrhem ym tang na ka bynta shimet shimet hynrei na bynta ka jingjop jong ka jingkyrmen ïa ka Jaidbynriew,” u la ong.
Shwa kane, u Bah Paul u la ïathuh ba tang shu jan poi ka elekshon, bun kiba wan ban khlieh dor ba ki don katta ngut ki nongbud bad nongkyrshan. Kumta, u ong ba kane kadei ka por ba hap ban ïakhun ïa kitei baroh namar ban im ka jylla bad ka Jaidbynriew donkam ban don ka jingïatylli bad ka jingbeit ka rukom treikam.
U ong ruh ba ka rukom wanrah kynhun ban ïaleh business ïa ka Secretariat kam long shuh namar ha kaba khatduh kiba shah lehbeiñ dei ka lawei jong ka Jaidbynriew bad ki khun ki kti tang na bynta ka bit ka biang jong ki hehspah. Katkum ka jingong jong u sa tang khyndiat por yn ym lah shuh ban tehlakam ïa ka Secretariat naba bun ki kam la bat da kiwei pat ki bym tip ei ei shaphang ka jinglong kyrpang jong ka Jaidbynriew.
Shuh shuh u ong ruh ba un ïai kren beit man ka por halor kane ka phang tad haduh ba kan da rung haduh ki thied snam jong ka Jaidbynriew.