– HT Wells
Tang shibnai tam hadien ba ka Dorbar Synrai jong ka Meghalaya ka thnam puk haba ïatai ïa ka mat kyrduh kam ki samla bad ka rukom thungkam ha ka jylla Meghalaya, ka motion ba la wanrah da uwei u Myntri barim jong ka Jylla, ki paidbah ki dangkhmih lynti ba kan don ka jingkylla bamut na ka liang ka sorkar MDA, pynban ka long da khongpong. La ngi phai sha ka result MCS na ka MPSC kumto ngi ïohi ïa ki kynrum kynram bad ki jingpyrshang jong kiba donbor ban pynkylla (manipulate) da kumne bad kumtai, kat haduh ba ka KSU lyngba u Chairman ka Employment Monitoring Cell jong ka, u samla Rueben Najiar ka la hap ban mih shakhmat ban dawa pynbeit da kumwei pat. Kane ka jingïakawangktieh ka la pyllong ruh ba u sitting MP Rajya Sabha ban kop ban resign noh lada lap ba ka lok jong u, (kawei na ki Member katei ka Commission) ba ka bamsap. Ka KSU ka la leit ai dorkhas shaduh u Lat ka jylla, u Chandrashekhar H Vijayashankar ban dawa ba dei ban thung noh da ka Independent Inquiry ban lap ïa ki sabud bad ban pynshitom ïa ki dkhot jong katei ka Commission.
Ha ka jingshisha, ka MPSC kan dei kawei na ki tnat treikam ba laitluid (autonomous body) ba lait na ka jingmushlia jong ki heh sorkar hynrei, namar ba la thung Member, Chairman ne Secretary hangtei kat kum ka jingjied jong ki High level, te aïu shuh phin khmihlynti na kita ki briew ba kin trei. Ki hap ban long ñiangkohnguh (subservient) ïa kiba la thung ïa ki. Dei hangne, ba ïa ka hok jong ki lakh ngut ki samla wadkam kiba la biang bha ka kyrdan jingnang jingstad kim ïoh kam satia wat haduh ba la dier por syndon ka rta jong ki.
Tang ka tdem jong katei ka jingmushlia MCS kam pat jah, mynta bluit mih biang sa ka result jong ka Staff Nurse ba la pynïakhun da ka Meghalaya Medical Services Recruitment Board (MMSRB), ka selection test kaba la long ha ka 21.09.2024 bad ka result kaba la pynmih ha ka 30.09.2024 na ka bynta ki 164 tylli ki post Staff Nurse bad 78 Auxliary Nurse Midwife (ANM).
Kat kum ka jinglap jong ki Sengbhalang, KSU, JSU bad HYC, la kynnoh ba ha juh ka result, la mih arsien ki juh ki Roll No. ba pass. Phi ka don ka jingshisha, haba phi la leh bakla ha kaba sdang, wat la phi pyrshang ban tep eitmiaw, ban pynbeit ïa kaba la bakla, ka nang bakla shuh shuh. U President ka HYC, u Bah Roy Kupar Synrem, u kynthoh ba kaba kham lyngngoh shuh shuh ka long ba ïa u juh u Roll no. ha ka first list da kawei ka marks katba ha ka second list pat da kawei.
Kaei kane ?. Hato don aïu sha lyndet jong kane ka jingleh. Tip ka dei kaba shu jia ryngkhat (aacident) ne da kumwei pat, ba ka juh ka briew kaba bat shuki minister ïa ka Education Department ruh ka mih ka jaboh (infamous) ‘Sialieh’ bad mynta pat de sa ka Health Department, mih ki score sheet kiba sngew thamula, haneng da kumwei harum da kumwei pat. Ban ong ba ka dei ka case bakla (oversight) ne errors te ym lah ban pdiang da lei lei ruh, namar shwa ba kan mih pyrthei don bun ki dealing assistants bad officers ha office ban check ryngkat bad ki note sheets jong ka file bad khmih bniah.
Kane ka jingleh kumba ka VPP ka pyllait Kyrwoh lyngba u Nongpathaikhubor jong ka u Dr Batskhem Myrboh, ka don kaei re kaei kaba sha lyndet. Ka long kumba kynnoh u Dr Mukul Sangma Leader of Opposition ba wat ha DSC, East Garo Hills ruh, la pynpass interview haduh 4 ngut tang na kawei ka longïing. Hangne ruh kumba long lem ki nonghikai ba la shah wengkam ha ka por jong u Lahkmen Rymbui kum u Education Minister, ki don bun ngut ki nursing candidate kiba la trei malu mala shawei bad kiba la don la ka family, bad kiba la jan kut artad ka rta ban kin ïoh kam sorkar, pynban da khongpong. Ka Kyrwoh u Dr Batskhem ka ong, ba ka sorkar kam don ka bor jinglah (ability) ban pynlong ïa kum kitei ki exams thungkam thungjam.
Kumno keiñ ki khun samla kin shaniah ïa kum kane ka sorkar, kaba la knieh wat ïa kaba ki la ïoh ruh kumba leh ïa ki nonghikai. Ha ka jaka ban thaw ïa ki kyndon ain ban pynskhem ïa kito kiba la hikai lypa da ki phew snem, pynmih pynban da ki aiñ MTET, D.El. Ed aïu re. Kumjuh ruh ïa kine ki samla ba ïakhun Staff Nurse exams, shano kin phet ynda ka rta jong ki la kut ban apply kam shawei pat ï. Imat, wat la ka NPP ka buhthong ha ka Manifesto jong ka, kumba ïai khleiñ u Conrad K Sangma ban pynmih kam da ki lakh tylli ki kam, pynban ki bun ki samla ki dang hap ban shong Thylli. Ka jingbakla jong kane ka sorkar MDA ka long ba kam lah ban pule ïa ka Sur u Paidbah, ba ka bor jingjied nongmihkhmat ka shong ha ki samla ka Ri. Peit myn ha kane ka election MP ba dangshu dep bun na ka liang synshar, ki kheiñ troiñ ‘nod’ (zero) ïa u Dr Ricky A.J. Syngkon, pynban u paidbah u pynjop kput haduh 4 Lakh duna pyrshah ïa ka kyrtong ka NPP, namar ba ki ïaid ha kato ka lyer sngewmeng jong ki, ba dei tang kito kiba haïing hasem jong ki bad ki katto katne ki hehspah ba synrop bad ka MDA ka la biang ban jop election. Hynrei, ka jingshisha kam long satia kumta. Lada phi kheiñ synrum ïa ki rit ki ria bad ki khun samla kiba ud ba ïam hapoh ka Sansnem ba phi shong shuki, ma ki ruh ki don la ka kylla ban ai jubab ha ka election 2025 & 2028. Yn sdang shwa na ka MDC election, phin i ïa ka jubab kumno u paidbah un ai.
Kitei ki samla nurse kim dei ban shu iehjem khlem da buddien balei ka mih result ha katei ka rukom bad balei yn duh ei kiba lehbha ha ka exams. Ki dei ban tih haduh tynrai ban lap, kaba lieh,ba lieh bad kaba ïong kaba ïong (dood ka dood, panai ka pani) kumba ong u dkhar. Ka jingpulom ka rukom treikam ha ki tnat sorkar khamtam ha kane ka liang thungkam ka long ha baroh ki liang namar ba la mushlia palat ki politicians. Ka jingpynsngew jong ki sengbhalang ba dei ban revamp ne ban pynbha da ki briew bym don jingïadei bad ki political party ka dei bha, hynrei ki lah ne em ban pressure haduh ban da longkhaw kata ka jingdawa.
Ha Assam wat ïa u Chairman ka APSC u la shah set along haduh mynta namar ki kynrum kynram bad ki kam bamsap. Bun ki samla ki la duh ei ïa la ka kam wat hadien ba ki la pyndep ïa ki kyrdan pule bad ki la dep ban apply kam namar kam don satia kata ka merit basis hynrei tang ka manipulation suda. Don ruh ki samla ba duh kam namar ba kata ka bor ban conduct interview kam lah ban khot interview wat hadien lai, saw snem ba la khot application, te bun ki over-age noh. Ka lawei badum ka ap ïa ki. Haba kumta, kumno ka Jylla kan kiew ï. Kyrmen ba ki Sengbhalang kin buddien wat haduh ban pynbor ïa ka sorkar ban conduct exam biang da kawei kaba long independent kaba lait na ka jingmushlia.Kaba long ka Sialieh, imat wat kane ka kam Staff Nurse ruh kan poi Ïinglieh Ïingsaw lada ym lah ban weng ïa kine ki kynrum kynram.Ka jingpynshai paidbah jong ka Medical Recruitment Board ha ka 3.10.24 ka dei tang ka jingda rapjot suda kumba tep eitmiaw hynrei wat la pyrshang ban tep ruh, ka oh oh ka dang paw hi.