Kito kiba ju pule kotkhubor, kim shym la ju mutdur satia, ba kane ka ishu them metor, kan shu sahteng haduh ha kine ki sngi, namar ba haba ki pule ïa ki laiñ khlieh jong ki kotkhubor ha ki 6 snem ba la dep, ki lap ba ki jingkular kiba hai hai bad kiba thiang ngai suda bad ngi kynmaw, ba ha ka por elekshon shiteng samoi kaba la pynlong ha Mawphlang, Mawryngkneng ha u snem 2021, ba ka mih bha ka jingkren, na U Bah Prestone Tynsong, symbud myntri rangbah, ha kaba ula kren shai, ba ka jingkynriah ïa ki kharmetor kan ïaid beit shakhmat, long katba long.
Katei ka kam, ka la ïaid la hynriew snem kynthih, hynrei kam shym la poi shaei shaei ruh bad la ïohi, kumba kaba sah lei, ka long kaba i artatien shibun bad kam dei tang katta, hynrei ngi ïohi, ba ka jingshisha, ka long ba u Ma Sniawbhalang Dhar, Symbud Myntri Rangbah, uba dei u Myntri ka tnat Pynroi Sor bad uba la khura lut ïa katei ka kam, ha ki 6 snem ba la dep ba u la sait kti noh ïalade bad u la bret pynban sha ka miej jong U Chief Secretary bad katei ka dei ka jingjia kaba leh ñiew beiñ ïa u ophisar rangbah, ha kaba la bret noh ïa ka kam, ka bym lah ban leh eiei ïalade.
Ha ka kam sorkar, ka ju long ka rukom, ba ka file kan ïaid na kiba napoh bad kan sa kiew sha kiba halor, hynrei lada jia pat ba ka ïaid nalor bad hiar shapoh, kumta ka la dei ka hukum bad kaba dei ban shu lehnoh; hynrei ha kane ka khep pat kam dei kumta, namar la ïohi, ba ki kharmetor, kim hun satia haduh mynta ïa kane ka jingïakren bad ki ïai sei ïa ki daw, kiba har har rukom, tang ban shu pynlut kai ïa ka por.
Ka sorkar jylla, ha ka jingïalam jong kitei ki arngut ki symbud MR, ka la shu pynlut kai ïa ka por, ïa ka bor, ïa ka bai shong jingïalang, bad kaba khlem mih soh shaei shaei ruh bad nangta, ka la shu bret kai ïa ka pisa 2 klur ha madan, ban ai sha U Syiem jong ka Hima Mylliem, khlem da ïoh ban pyndonkam ïa katei ka jaka tang shi saphit ruh.
Kam dei tang kata, hynrei kaba i tieng, ka long, ba lyngba kane ka jingïakren, ka la pynïatylli ïa ki kharmetor bad ki para jaitbynriew jong ki, namarba ka jingïakren ïa katei ka ishu, kam dei satia bad kito kiba trei ba ktah ha ki ophis sorkar jylla lane kiba shong basah ha them metor, hynrei kata ka High Level Committee (HLC), ka ailad ban pynïar ïa ka jingïakren, ha kaba kitei ki jaitbynriew kiba na Delhi, na Punjab bad wat na shabar jong ka India, ki la don bynta ban ïa kyrsum lang ïa katei ka ishu bad kumta ka jingïakren ka kylla kam kai noh, namar ba ki bym don bynta eiei ruh, ki ïoh ban ïa kynshuit bad ki nang aiding narud narud bad mynta lei katei ka mat, kam dei shuh, ka jingkynriah ïa ki kharmetor, hynrei, ka la nang paw shabar, ba ka dei ka jingleh thombor jong ka sorkar jylla, ïa kitei ki rit paid bad ïa kata ngi ïohi, ba ka Minority Commission, ka la dep khot hajir ïa U Syiem Mylliem, halor katei ka mat.
Ka mat ïakren hi baroh kawei, ka la sniew dur lut nadong shadong bad ïa mynta, kaba donkam, ka long ba ka ophis U Chief Secretary, kan aiti beit ïa katei ka kam sha ka rai jong ka kashari, lada dei ka High Court ne ka Supreme Court bad ïa ka liem ka lup, kan shong beit ha ka rai kut jong ka kashari bad ka jingai jingmut ka long ruh ba ki riew saiñ pyrthei lane ki parti bapher bapher, ba kim dei ban shu balaiñ siang sdieh ïa kane ka mat, namar ba ka nang ai ding pynban hakhmat u paidbah paidkar bad ka nang pynjwat pat, ha kaba ïadei bad ka jingteh kyndon jong ka aiñ.
Mynta kane kam ka la nang jyrwit jyrwat shuh shuh naba kine ki briew kiba sah hapoh them ïew Mawlong ne Them Metor ki la kwah da ka jaka kaba don ha katei hi ka jaka sah jong ki, kaba dei ruh jong ka Cantonment Board bad mynta ka shong sa ha ki shipai la kin long ne em kiba la kloi ban leh ïa kane ka kam.
