Shillong, Nailur 26 : Ka ishu jong ki nonghikai kontrak kadei ka ishu kaba jyrwit bha, ong u Myntri Rangbah ka Jylla ha ka sngi Nyngkong.
‘Ngim lah satia ban ong beit ba ngi lah ban ai ïa ki namar ka kam ba ki trei kadei ka kam kontrak,” u la ong. Shuh shuh u ong ruh ba lada don ki lad ki lynti ban ïarap ïa ki ha kawei pat ka ruom da kaba bud ïa ki kyndon kiba don ha ki tnad lane ha ka sorkar u long uba kloi ban bishar bniah.
“Hynrei ban ong beit ban thung kam ïa ki kam dei satia kaba suk ïangi namar ki don ki kyndon bad kiba hap ban bud,” u la bynrap biang.
Dang shen ka kynhun ki nonghikai kontrak ba la shah weng kam kiba don ha ka lama Meghalaya Government Lower Primary Contractual Teachers’ Association (MGLPCTA) ki la dawa beit ba ka sorkar kadei ban thung kam ïa ki. “Ngi kwah ba ka sorkar kan thungkam ïangi bad lada ka sorkar ka mon ka lah ban leh kumta namar ki don haduh 36 tylli ki skul ki bym pat don nonghikai,” ong uwei na ki nonghikai ba la shah weng kam.
Da kaba pynpaw ïa ka jingsngewsih halor ka jinghap mih jong ki nonghikai ban iakhih naduh ka 07tarik mynta u bnai da kaba ïaid man la ki distrik ki dkhot jong katei ka kynhun ki ong ruh ba kin sa phah da ka jingthoh sha u Myntri Rangbah ka jylla kumjuh sha u Lat ka jylla u Satya Pal Malik halor katei ka mat jingdawa.
