Shillong, Jylliew 14 : Ka ishu ‘High Level’ kadei ka ishu kaba baroh ki kren mynta ym dei shuh tang hapdeng ki heh sorkar, nongtrei kam sorkar, hynrei kadei ka mat kaba wat ki nongkhaii dewiong, nongkhaii mawshun ne ha ki jaka treikam hynrei wat ha ki jaka paidbah bad ruh ha ki dukan sha, ong u MLA ka BJP na Pynthorumkhrah, Bah AL Hek ha kane ka sngi Ba-ar. Haba kren bad ki lad pathai khubor, u Bah Hek u ba dei ruh u Myntri barim ka sorkar jylla u la ong ruh ba baroh mynta ki ïakren shaphang bun ki rai kiba la shim ha kita ki ‘High Level’. “Hap ban wad kaei kaba kine ki High Level ki leh bad mano ba don ha kine ki High Level,” la bynrap shuh shuh u Bah Hek haba kren halor ka ishu kynnoh bamsap ha kane ka sorkar MDA.
Nalorkata, u ong ruh ba mynta ki la ïakren lut kumno ïa ki kam baroh la bthah ba dei ban pyntrei beit da kita ki High Level. “Dei ban kylli na kita ki High Level namar nga ïalade ngam lah satia ban ïathuh namar ngam don ha ka,” u la bynrap biang.
Watla na ka liang jong u, um treh ban kren bniah halor kane ka bynta hynrei u la shu ong pat ba ha ka jylla ki ju don ki high level committee, ki high powered committee hynrei ka shong pat ha ki paidbah ban wad mynta la kitei ki high level ki dei ki juh lane kidei da kiwei pat ki high level. Shuh shuh u kynnoh da kaba ong ba ha ka jylla mynta baroh ki rai la shim beit da ki High Level la ka long naduh ka jingpyntrei ïa ki skim bad ki kam kiba man ka sngi ha ka jylla la pynïaid lut da da ki.
