Ka ishu dawa Distrik kan ym lah ban long ka ishu elekshon: Bah Titos W Chyne

Shillong, Naiwieng 02 : U President ka UDP East Khasi Hills ba dei ruh u MDC ka Sohra bad CEM ka Khasi Hills Autonomous District Council (KHADC), Bah Titos W Chyne u la ong ba um tharai ba ka ishu dawa distrik ha Sohra kan kylla ong ka ishu elekshon.
“Baroh ngi ïa donkti ha kane ka jingdawa distrik ha Sohra, la ka long naduh ki Khlieh Nongsynshar, Syiem, u paidbah, ki sengbhalang bad mangi ki nongmihkhmat ngi don bynta lang bad kumta ban pynkylla elekshon ishu ïa kano kano ka party nga sngew ba kan ym ïahap ha kum kane ka por,” u la ong haba kren bad ki lad pathai khubor.
Shuh shuh u ong ba lada dei ba ka jia shisnem mynshwa lehse lah ban ong ba kadei ka jingïarap jong kano kano ka political party. “Hynrei mynta sa tang arbnai ka elekshon kumta ban ïa pynkhih elekshon ishu ban ong ba dei tang manga uba kren bad leh ïa kane nga sngew ba ka long kaba bakla,” u la bynrap biang.
Shuh shuh u ong ba shwa ban rai ïa katei ka bynta donkam ïa baroh ban ïamir jingmut lang ym ba ka sorkar kan shim rai tang bad katto katne. “Dei ban rai lang bad ki nongmihkhmat, ki MLA Sohra, Shella bad MDC baroh arngut, u Syiem, ki Khlieh Nongsynshar jong kito ki Elaka ki bym hap ha ka Hima Sohra. Donkam ka jingïamir jingmut kaba shai namar ngim kwah re ba ka jingpynbna distrik kan long tang ka jingbuh mawnongrim hynrei kadei ban long kaba beit ba ryntih bad kaban ïahun lang.”
U ong ruh ba dei ban don ka jingïahun lang haei ban buh ïa ka Headquarter, haei ka jaka kaba tikna ba lah ban ïoh, ka pisa ka la don lypa neem. “Kumta nga shu i sammut ba ha kine ki sngi nga ïohi ba mih kyndit kyndit ka jingïakren distrik tang na ka daw ba mut ïaleh elekshon,” la bynrap biang u Bah Titos.
Dang ha kine ki khyndiat sngi ki nongïalam jong ka District Demand Forum ki la kynduh ïa u Myntri Rangbah ryngkat ban pynkhie im biang ïa ka jingdawa distrik na ka bynta ka tei ka thaiñ. Watla na ka liang u Myntri Rangbah um pat ai kano kano ka jingkular hynrei na ka liang ka Forum pat ka la pynpaw ba ki don ka jingkyrmen ba katei ka jingdawa jong ki kan long kaba seisoh.
Dang shen na ka liang u kyrtong ka NPP na Sohra, Bah Allan West Kharkongor ha ka jingkren jong u, u la pynpaw ba ki paidbah ka thain Sohra ki khmih lynti bad ki angnud ba kin ïoh ka jingai sngewbha Kristmas da ka Distrik na ka sorkar.