Shillong, Kyllalyngkot 18: U Myntri Rangbah ka Jylla Conrad K Sangma ula pyntip ïa ka jingkiew shaphrang ka Jylla ha ka jingtreikam ka kor Internet bad ong ba haduh 90% ki jaka ha Jylla kila ïoh ïa ka 4G network.
Hynrei, ula kubur ba ki dang don ki jaka ki bym pat biang, ha kaba ka jingtreikam ka internet kam pat long kaba biang.
“Ngi la ïatreilang bad ka Sorkar India ban weng ïa kine ki jingeh” ong u Conrad haba ïakren bad ki nongthoh khubor shabar jong ka Cabinet Retreat ba 3, ba pynlong ha Mawkasiang hynne ka sngi Saitjain.
Ula ai nuksa ïa ka jingeh ha ka liang ka jingai bording kaba ktah ïa ki telecom tower, kaba la lah ban pynbeit ha ka jingïalang bad ka MeECL lem bad ki Ophisar ka Tnad Bording.
U Myntri Rangbah ula ban jur ïa ka jingkongsan ka jingpynïasoh da ki optical fibre, haba pynpaw ba ka Sorkar ka don jingthmu ban pyndonkam ïa ki tower ka MeECL bad ki nar post elektrik ban ai ïa ka kor internet sha ki shnong ba khatduh eh ha ki District, Block nalor ki skul, ki Ophis Sorkar hapoh ka arsnem.
Halor ka kam sengkam, u Conrad ula ong ba ka PRIME Prokram kala ïarap ïa palat 5000 ngut ki nongsengkam bad ka Sorkar ka don jingthmu ban nang pynbun shuh shuh.
