Shillong Naitung 12: Ka Federation of Khasi, Jaintia and Garo People (FKJGP) ha ka sngi Baar jong ka 12 tarik Naitung ka la ïoh ban pyntian smai ïa ki nongïalam ba thymmai jong ka Central Executive Committee ha U Soso Tham Auditorium Shillong ha kaba la u Bah Dundee Clif Khongsit u la bat kum u President ba rangbah ka seng bad u Bah L Newton Lyngdoh kum u General Secratary jong ka.
Haba ai jingkren hadien ba la shimti kum u nongïalam ba thymmai u Bah Dundee u la ïathuh ba na ka liang ka FKJGP kan bteng ban ïakhun tyngeh ban pynurlong ïa ka jingdawa ILP kaba ki paidbah jong ka jylla ki la angnud la slem bha.
U Bah Dundee u la pynpaw ruh kum u nongïalam ba thymmai ka FKJGP kan buh thong kyrpang ban ïakhun ïa ka bamsap kaba la bam klep lut ïa ka lawei ki samla bad ki pateng kiban dang wan.
Shuh shuh u Bah Dundee u kyntu kynpham ruh ïa ki dkhot bad ki shipai jong ka FKJGP ba kin long barabor kiba kloi ban len lade na bynta ka bit ka biang jong ka ri bad ka Jaidbynriew bad ban trei shitom ban pynthikna ba ka ri bad ka khyndew ka shyiap kaba ka pateng ba mynta ka shim kylliang na ki mandien kan long kaba shngaiñ bad kaba bha.
Haba ai ïa ka jingkren kitbok kitrwiang ïa ki nongïalam ba thymmai u Bah Wellbirth Rani uba la rai ban shongthait noh na ka kam President FKJGP u la kyntu ïa ki dkhot bad ki nongkit kam ba thymmai ba kin ym pynsngap ïa ka jingkren kynthoh kiba bun ïa ki kam kiba ki seng bhalang ki la noh sha ka jaidbynriew.
“Kynmaw kum ki nongïalam seng bhalang phi kit ïa ka lyngkor kaba khiah tam namar ka jingkhmih lynti kiba bun ka jur bha na phi. Ngi ïohi ba lada kiew dor ki marbam ki paidbah ki kylli shaei ki seng bhalang, lada jah bording ruh kin wad ïa phi bad kane ka pyni ba ban ïa ki nongmihkhmat kiba ki la jied ki kham phai khmat sha phi” ong u Bah Wellbirth.
“Ai kin kynthoh katba ki kynthoh ïa phi ki nongïalam seng bhalang hynrei nga kop ba lada ym dei na ka jingdon ki seng bhalang ha ka jylla naduh mynno kum ka jaidbynriew ngi la shah tap ha ki briew kiba na bar” bynrap u Bah Wellbirth.
Shuh shuh na ka liang jong u u kyntu ïa ki seng bhalang ba kin pynkreh ban pynmih shibun ki shipai kiban ïakhun ha madan haba dawa ka kam da ka bor jong ki da kaba ong ba bunsien hi ka sorkar kam ju pushe satia ïa kiwei pat ki lad jingïakhih ki seng bhalang “peit lada ym dei na ka jingther maw ha ka jingïakhih ban pynkynriah ïa kiba sah ha Them Ïewmawlong nga thikna ba ka sorkar kan ym thung satia ïa ka HLC jong halor kane ka kam” ong shuh u Bah Wellbirth.
Na ka liang pat u President jong FKJGP Garo Hills Zone u Pritam Arengh u la pan ka jingïatreilang bad ka jingnoh synïang lem ki nongïalam seng bhalang na rilum Khasi ha kaba ïadei bad ka jingthmu jong ki paid Garo ban ïakhun mokotduma pyrshah ïa ka MoU ba la ïa soi hapdeng ka sorkar Meghalaya bad ka sorkar Assam.
Ha kane ka sngi la ïoh ruh ka jingkren kitbok ïa ki nongïalam ba dang shah pyntian smai ka FKJGP na u President ka KSU u Bah Lambokstarwell Marngar, Bah Sadon Blah President HNYF, Bah Bipul Thangkhiew President RBYF, Jersome Shylla President JSU bad kiwei de.
