Ka ILP bad ktien Khasi bad Garo ka don ha ka bor jong ka Sorkar Pdeng

Shillong, Nailar 04 : Ka ishu jong ka Inner Line Permit kumjuh ka jingdawa ban pynrung ïa ka ktien Khasi bad Garo ha ka Khyrnit kaba Phra jong ka Riti Synshar ka Ri, ka don mynta ha ka ktien jong ka sorkar pdeng, ong u Myntri Rangbah ka jylla, Conrad K Sangma haba kren bad ki lad pathai khubor ha kane ka sngi Palei.
U Myntri Rangbah u la ong ruh ba ka sorkar jylla ka la dep la ka bynta ban mynjur da ka Resolution hapoh Iing Dorbar Thawaiñ ka jylla haba ïadei bad katei ka bynta.
“Ka kam mynta ka don ha kti jong ka sorkar Pdeng bad haduh mynta ngi dang ïai bteng ban buddien ban pynsngew bad ïai kyrpad ïa ka sorkar India haba ïadei bad kitei ki ar tylli ki mat,” la bynrap shuh shuh u Myntri Rangbah.
Lah ban kdew hangne, dang ha kine ki khyndiat sngi ba la dep, ka All India Trinamool Congress lyngba u MP jong ka, u la kren ha Parliament ban dawa pynrung noh ïa ka Ktien khasi bad Garo ha ka Khyrnit kaba Phra. Katei ka jingkren jong utei u MP ka TMC ha Parliament ka la pynlong ïa ki MLA jong katei ka party ban ai ka jingïaroh kaba khraw katba na ka liang ki nongïalam ka NPP pat ki la kynnoh ba katei kadei tang ka buit politik ba la jan ka elekshon.