Nongstoiñ Rymphang 01: Ka jingdon ka ïingkashari jong ka District Council ha Nongstoiñ ka la ïarap shibun ïa ki paitbah nongshong shnong jong ka West Khasi Hills District kiba ba don ïa ki mokutduma bapher bapher namar kiba bun ki jingïakajia kiba mih hapdeng jong ki para nongshong shnong na kiba bun bah ki daw la ka long ha ka ïaknieh jaka puta, ki kam shnong kam thaw bad kiwei kiwei de. Kane ka ïingkashari jong ka District Council kala pynsuk shikatdei eh namar kumba ka long ha ki snem ba mynshuwa, ha ki snem ba mynshuwa ki nongshong shnong kiba ïaleh mokutduma, la ka long ki nongmudui bad ki shahmudui ki hap ban leit mih sha ka ïingkashari ha District Council kaba don ha Shillong kane ka wanrah ïa ka jinglut jingsep ha ka bai leit bai wan bad lada ym dep ka kam kila hap ban sah miet bad kiba bun ki bym don ïa kiba haïing hasem lane ki paralok ba ïa ithuh ithaw ki hap ban sah ha ki ïingbasa.
Nangta shuh shuh, kaba kham shem shitom ka long ka jingbympoi biang por jong ki jingpyntip ha ki nongshah mudui bad ki nongmudui ka buh ha ka jingeh kaba khraw namar shisien ba ka ïingkashari ka la buh ïa ka tarik ba ki dei ban wanmih bad kim ïoh ha ka por kaba biang ïa ki jingpyntip. Dei halor katei ka nongrim ba ka District Council ha ki snem ba mynshuwa ka la shimkhia bantei noh da ka ïingkashari ha Nongstoiñ khnang ba ki paidbah jong ka district kan ïarap bad pynsuk.
