Ka Ïingdorbar ka dei ka ïing kyntang ban saiñdur ïa ka shnong ka thaw: Prestone Tynsong

Shillong, Naitung 27 : U Symbud Myntri Rangbah ka jylla u Bah Prestone Tynsong ha ka sngi Saitjain u la plie paidbah ïa ka Ïing Dorbar jong ka Dorbar Shnong Nongshken kaba la tei ha ka jinglut kaba kot sha ka 45 lak tyngka lyngba ka skim Special Rural Work Programme (SRWP).
Ha kane ka sngi la donlang ruh ka MDC ka thain, Kong Grace Kharpuri nalor ki Khlieh Nongsynshar bad ki riewrangbah jong ka thaiñ nalor ki nongshong shnong, ki nonghikai bad ki khynnah skul.
Na ka liang u Kongsan uba dei ruh u MLA ka thain haba kren ha ka jingïalang u la ong, “Ka Ïing Dorbar kadei ka ïingkyntang ban saindur ïa ka shnong ka thaw, kumta nga dap da ka jingkmen ba nga ïoh ban wan plie ïa kane ka ïing dorbar.”
Shuh shuh u la ïathuh ba dei ha u snem 2022 la lah ban pynurlong ban buh maw nongrim bad dei ha katei ka sngi u la ïoh pat ïa ka lad ban wan plie paidbah.
Ha kajuh ka por u la ai ruh ka burom ïa ki trai jaka kiba la ai sngewbha ïa ka jaka ban tei ïa kane ka ïing shnong bad u ong ruh ba dei lyngba ka jingtrei borbah jong u Rangbah Shnong ba ka kam ka la long kaba seisoh.
Khnang ba ki shnong ki thaw kin kiew ha baroh ki liang, u Bah Prestone u la kyntu ruh ïa ki nongkitkam shnong ba kin ai ka jingïatrei lang bad ki MLA bad MDC khnang ba ki kam pynroi kiba dei na ka bynta ka thain kan ïaid beit.
U ong ruh ba u thrang ban ïohi ba ka Nongshken kan long kum ka model village hynrei ban pynurlong ka donkam pat ïa ka jingïatrei lang ha baroh ki liang.
Ha kane ka jingïalang, na ka liang ka MDC ka la ong ba nangne shakhmat ka thain kan dang ïoh kham bun shuh shuh ki jingkyrkhu lyngba ki kam pynroi.
Halor ka jingïoh ïa kane ka ïing dorbar, ka kong Grace kala pynpaw ba kane ka shnong kadei ban don ïa ka mynsiem jong ka jingsngew nguh bad bynrap ruh ba ma ka kum ka MDC bad u Bah Prestone kum u MLA ka thain kin ïa bteng ban ai ka kti kamon ka kti kadiang hapoh ka shnong ka thaw.
“Kino kino ki kam kiba ka Dorbar Shnong ka don ïa ka jingthmu ban leh ka long kaba donkam bha ba ki paidbah ban long kiba ïai shah namar na ka liang u MLA bad ma ka kum ka MDC kin leh ïa kaba bha tam,” ka la ong.
Ha kane ka sngi na ka liang ki nongïalam shnong ki la pynpaw ïa ka jingkmen kaba khraw ba ki la ïoh ban plie paidbah ïa katei ka ïing shnong ba thymmai kiba ki la thrang la slem slem bha.