Shillong, Naiwieng, 20: U Myntri Rangbah ka Jylla u Conrad K. Sangma ha ka sngi Balang u la plie paidbah ïa ka Integrated Command and Control Centre ha ka shnong Umsawli, Shillong ryngkat ka jingsakhi lang jong u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar, u Chief Secretary Bah Donald P. Wahlang, ka Director General of Police (DGP) Kong Idashisha Nongrang, u Commissioner & Secretary jong ka tnat Pynroi Sor u Vijay Kumar bad u Commissioner & Secretary ka tnat Information Technology u Pravin Bakshi.
U Myntri Rangbah haba kren ha kane ka sngi u la ong ba ka Integrated Command and Control Centre ka dei ka jabieng jong ka Shillong Smart City bad lyngba kane ka Centre yn pynïasoh ïa kiba bun ki jait kam ha ka liang jong ka Information Technology bad nalor ba ka long kum ka Application Programming Interface kan pynsuk ïa ka jingtreikam jong ka ICCC.
Haba kren shaphang ka jingpyndonkam ïa ka ICCC kum ka jingpeitngor, ka jingkhmih ïa ki jingjia lynshop mariang, ka jingpynphriang ïa ki lad jingtip bad ka jingpynïaid ïa ki jingtreikam jong ka sor ba man ka sngi u Myntri Rangbah ka Jylla u la ong, “ïa ka teknoloji yn lah ban pyndonkam tang haba pyntreikam pura bad ka jingdon ïa ka ICCC kam mut ba ngin lait na ki ki jingeh hynrei ki jingtip na kane ka ICCC bad ka jingpyndonkam jong ka ha ka jingshim rai bad ka jingleh kaba mih na ka, kin wanrah ïa ki jingkylla,” u la ong.
U Myntri Rangbah u la kyntu ïa ka tnad IT, Urban, Police, Municipal ban pyntreikam ïa ki SOPs, ki kyndon bad don ïa ki tiar khnang ba ka teknoloji kaba don mynta yn sa lah ban pyndonkam na ka bynta ban pynbha ïa ka sor Shillong bad ban pynlong shisha ïa ka, ka Smart City. U la pyntip ba ka sienjam kaba bud ka long ban thaw ïa ka jaka buh jingtip (Data Centre) kaba heh bha ha ka ICCC, “ka Meghalaya ka dei ban long ka jaka buh jingtip ym tang jong ka thaiñ Shatei Lammihngi hynrei jong ka thaiñ mihngi baroh kawei namar ngi don ïa ka lad kaba biang,” u la pyntip.
U la ong ruh ba ka Sorkar ka buh ïa ka Optical Ffibre Connectivity ha manla ki Block bad ha kaba kut manla ki district kin sa pynïasoh bad ka ICCC.
“Ngi dang trei tyngeh ruh ban pynthikna ba ngin lah ban pynhap ïa ki Submarine Cable ha Shillong bad ka thong jong ngi ka long ban pynïasoh ïa manla ki Block bad manla ki District ha ka IT Network kaba pura,” u la ong. U la bynrap ba ka ICCC kan pynkhlaiñ ka bynta ban wanrah ïa ka jingsynshar kaba bha ha ka rukom kaba kham shemphang namarba kam dei tang shaphang ka smart city hynrei hynrei ka jingsynshar kaba beit.
Ha kaba pynkut u la ong ba ïa ka jingïashim bynta bad jingïatreilang jong ki paidbah bad ka imlang sahlang bad u la bynrap, “ka nongbah ka lah ban long kaba kiew shaphrang tang haba baroh ki ïatreilang ym tang ban pynlong ïa ka kum ka smart city hynrei ka nongbah kaba khraw.”
U la ong ruh ba ka nongbah Tura bad Jowai shen kin sa shah pynïasoh lang ha ka ICCC.
Ka ICCC, Shillong ka dei kaba la pynïaid da ki model bad ha ka jaka jong ka API, ka rynsan jong ka ICCI ka shim ïa ka rukom kren ba pynbna lyngba ki tiar, ka dei ruh ka rukom pyndonkam da ki nongdie bad uno uno u nongdie u lah ban pynïasoh bad ka rynsan Digital jong ka ICCC khlem da kheiñ ïa ka rukom pynïadei. Ka rynsan jong ka ICCCI ka long ka API kaba plie ka long kaba lah ban pynïasoh bad ki Apps ba la don lypa jong ka sor lane ka jingpynïasoh bad ki aplikeshon kiba dang wan. Ki bynta ba kongsan jong ka ICCC Shillong ki long ka ICCC platform, ka ICCC kaba don ka jaka treikam kaba don ka video wall kaba lah ban shong 30 ngut ki nongpynïaid bad 20 tylli ki jaka treikam, ka jaka buh jingtip, ka jingpynbeit ïa ka jingïatreilang bad ka jaka ïakynduh bad ka Network jong ka sor bad ki bynta jong ka ICCC ki long ka City Surveillance System with Video Analytics, Solid Waste Management System, Intelligent Traffic Management System, City Wi-Fi, Public Address System, Emergency Call Box ba don ïa ka Public Address System, Variable Message Display, Smart Pole bad Smart Street Lighting.
La buh ïa ka City Surveillance System ha ki 96 tylli ki jaka, ki Smart Poles ha ki 20 tylli ki jaka bad ka Variable Message Display ha ki 20 tylli ki jaka.
Ha kane ka jingplie paidbah la donlang ruh ki rangbah shnong jong ka nongbah Shillong, ki ophisar na ka tnad Pulit, na ka tnat Pynroi Sor bad na ka tnat Municipal.
