Shillong, Ïaiong 9: Ka Hynñiewtrep Youths’ Council (HYC) ka pynrem jur ïa ka rai jong ka Sorkar Jylla bad ïa ka jingleh jong ki bor pynïaid District ka East Khasi Hills District ha kaba kim shym la ailad ïa ki dkhot ka Green-Tech Foundation ban pynlong ïa ka jingïakhih kaba jai jai hakhmat ka Secretariat halor ka jingthmu ban shna ïa ka Five Star Hotel ha Umïam.
Katkum ka kyrwoh khubor na u President ka HYC u Bah Roykupar Synrem u la ong, Kum kane ka jingleh jong ki bor pynïaid ka long kaba pynduh jingkyrmen shibun bad ka pynmih ïa ki jingsngewkhia kiba jur shaphang ka jingshim khia jong ka Sorkar ïa ki jinglong jong ka synshar paidbah bad ka hok riti synshar jong ki nongshong shnong ban pynpaw ïa ki jingmut jong ki da kaba jai jai halor ki mat kiba iadei ïa ki paidbah bad ïa ka mariang.
“Ka pung Umïam ka dei kawei nongkynti ba kongsan tam jong ka Meghalaya ha ka liang jong ka mariang.Kano kano ka projek kaba lah ban ktah ïa ka pung bad ïa ka mariang dei ban leh da kaba husiar bha bad dei ban don ka jingïakren paidbah kaba biang bad ka jinglong kaba shai” ong u Bah Roy.
Shuh shuh u la ong, Ka jingbym ailad ïa ki kynhun kiba iada ïa ka mariang bad ki nongshong shnong kiba sngewkhia ban pynmih ïa ka sur jong ki ka phah tuh ïa ka khubor kaba bakla bad ka pynduhjait ïa ki nongrim jong ka synshar paidbah bad ka jingiashim bynta lang jong ki paidbah.
U Bah Roy u la ong, “Ka HYC ka ïeng ïatylli lang bad ka Green-Tech Foundation bad baroh ki nongshong shnong kiba sngewkhia shisha ban ïada ïa ka pung Umïam.Ka Sorkar ka dei ban burom ïa ka hok synshar paidbah jong ki paidbah bad ban ïashim bynta ha ka jingiakren kaba laitluid ban ïa kaba pynduh pyndam ïa ki jingiakhih kiba jai jai”.
