Ka HSPDP kam khot hajir ïa kiba kwah mih ai ki paidbah kin rai ha u 2023: KP Pangniang

Shillong, Jymmang 29: U bah K.P Pangniang President ka HSPDP bah K.P Pangniang, u la ong ba ka party kan nym khot hajir ïano ïano ruh ha kaba ïa dei bad ka shithi kaba la phah da kita kiba kam ba ki dei ki nongïalam ka party hapoh Mawkyrwat konstitwensi ba kin ïa treilang bad ka UDP.
“Kum ka party ngin nym khot hajir ïano ïano ruh hynrei ai ki paidbah ka Mawkyrwat Konstitwensi kin sa ai ïa ka jubab ha ka por ka biang ne ha u 2023, kam myntoi ban khot hajir ïano ïano kiba kwah mih ai kin mih namar yn ym lah ban bat ïano ïano lada dei ki nongïalam ne ki MLA ruh” la ong u bah Pangniang.
Na ka liang ka party kam shym leh kano kano kaba pyrshah, hynrei kala ai ka lad ba lyngba jong ka party HSPDP ba kin shakri ïa ki paidbah, lada ki mih noh kata ka shong ha ki, “ Lada mih ai ki paidbah kin sa jubab ïa ki ha ka por ba biang la da dei ïano ïano ruh hynrei ka party kan ïeng beit hala ka jong ka nongrim kum ba la suit lashor ïa ka” ong biang u bah Pangniang.
Ha kine ki khyndiat sngi ki nongïalam jong ka party HSPDP na Mawkyrwat kila phah ïa ka shithi sha ki nongkitkam ka party ba kin leit ban pynïasoh noh bad ka party UDP bad kane kala dei ka dak ba u MLA na ka party HSPDP ruh u lah ban leit noh sha ka UDP ka shu long ba u shu ap tang ka por ban pynïasoh sha UDP namar la ïoh jingtip ruh ba u thmu ban ïakhun na ka UDP ha u 2023.