Ka HNLC ka kyrmen ba ka jingkren ïasuk kan wanrah ruh ka jingkylla ha ka Saiñ Pyrkhat

Shillong, Nailar 12 : Ka Seng Hynniewtrep National Liberation Council (HNLC) ka kyrmen ba kane ka jingïakren ïasuk hapdeng ka sorkar pdeng, sorkar jylla bad ka seng kan wanrah ruh ka jingkylla ha ka Saiñ Pyrkhat Pyrdaiñ, ka Saiñ Hima Sima bad ka Synshar Khadar ka ban pynkhlaiñ bor shuh shuh ïa ka Jaidbynriew Hynniewtrep.
“ Ngi kyrmen ba kane ka jingkren ïasuk Indo-Hynniewtrep kan wanrah ka jingkylla ka ban ai bor shuh shuh ïa ka Jaidbynriew Hynniewtrep” ong ka kyrwoh na u General Secretary cum Publicity Secretary jongka HNLC u bah Sainkupar Nongtraw.
Ka kyrwoh ka la ong ba ka jingïaleh jongka seng HNLC ka long halor ka saiñ hima sima kumta donkam ban wanrah ka jingpynkylla bad jingpynbeit ban pyllait ïa ki khun ka Bri U Hynniewtrep na kiba bun ki jingeh ba ki ïa kynduh na ka por sha ka por.
Shwa ïa kane, ka Seng ka pynkynmaw ïa ki paid Hynniewtrep ba ïa ka seng HNLC la suit la shor ha ka 14 tarik Nailar 1987 bad kumta kan dap 35 snem ki jingïaid lynti jongka ha ki jingïaleh ha kane ka 14 tarik Nailar 2022.Shwa ban jam sha katei ka sngi, ka seng HNLC ka kwah ban ai khublei sha iwei pa iwei i dkhot jongka kiba kynthup na ka tnad shipai bad na ka tnad saiñ hima sima ruh. Khamtam ïa ki nongïalam jong kiba la pynkup bor ba kin leit ïashim bynta ha kane ka jingkren ïasuk Indo-Hynniewtrep.
Ka seng ka kwah ban ai khublei sha baroh ki longïing longsem jong ki dkhot jongka, kyrpang eh ïa kito ki long ïing kiba la duh noh ïa ki khun ki kti jongki ha ka jingïaleh. Kine ki shipai kiba la iap haka jingïaleh kim shym la iap hynrei kin ïai long ki Martyr ha ka Bri u Hynniewtrep.
Ka seng ka ai khublei ruh ïa ki Seng Bhalang, ki Seng bapher bapher ha kane ka Bri U Hynniewtrep kiba ladon ryngkat bad ka seng ha baroh ki por, ïa ki khun ki hajar ka bri u Hynniewtrep Hynniewskum. Kyntang ïawai ka seng HNLC kan ïai bteng ban ai ka jingshakri ban ïada ïa ka ri bad ka Jaidbynriew Hynniewtrep la ka long da kano kano ka rukom ruh.
Kum ka jingkynmaw ieit ïa ka Lyngkhuh Snem ba nyngkong ka jingkhlad noh u General Secretary ba rim ka seng u bah Cherishterfield Thangkhiew uba la shah siat iap ha ki bor pulit ha kum kane ka sngi ha u 2021 kum u Martyr ki dei ban kynmaw ba ym don ba lah ban pynlip ïa ka ding jongka jingieid jaidbyriew kaba la rhem bha ha ka tyllong dohnud jong ka jaidbynriew Hynniewtrep.
Namar uno uno uba kloi ban pha la ka jingim ban ïada ïa ka khyndew ka shyiap jongka jaidbynriew kita ki dei ki martyr bad uno uno uba phah ïa la ka jingim ban ïaleh laitluid ïa ka ri bad ka jaidbynriew kita ruh ki dei ki martyr. U bah Che ruh u dei uwei na ki martyr jongka Jaidbynriew Hynniewtrep bad ngi burom ïa u. Ka seng HNLC kan ïai kynmaw burom ïa ka jingim bad jinglong une u nongïalam jongka u bah Che uba la synniang bad aiti ïa la ka jingim na ka bynta ka Jaidbynriew. Im Slem Bah Che, Im slem HNLC, pynkut ka kyrwoh na u bah Sainkupar Nongtraw.