Shillong, Risaw 17: Ha ka jingïalang plie kaba lyngkot u Prof. (Dr.) Nalin Mehta, Director ka NEIGRIHMS, u la aiti ïa ka kor Hyperthermic Intraperitoneal Chemotherapy (HIPEC) kaba thymmai na ka bynta ban ai ka jingsumar ïa ki nongpang hapoh kane ka jaka pule ha ka sngi Balang.
Dr Caleb Harris, Surgical Oncologist, la batai halor ka rukom treikam jong kane ka HIPEC ha kaba la ong ba la buh ïa kane na ka bynta ki nongpang kiba pyndonkam ïa ka chemotherapeutic ha ki bynta jong ka kpoh khnang ban ïoh ka jingsumar kaba biang.
Ka kor HIPEC ka don bun ki kabu kiba lah ban pyndonkam na ka bynta ka chemotherapy. Kadei ka kor kaba pyndonkam tang na ka bynta uwei u nongpang ha ki jaka puid, ha ka jaka ban sumar ïa kiba bun ngut da kiba bun ki taïew, bad 90% ka dawai ka neh hapoh ka kpoh, kumta ka pynduna ïa ka jingktah jong ka chemotherapy ha ka met baroh kawei jong u briew.
Kane ka jingtyrwa ka ai ka jingkyrmen na ka bynta ki nongpang kiba don ka jingpang bympong kaba la kham jur. Dr. Daniala C, Medical Superintendent la ong ba ka NEIGRIHMS kan ïaid shakhmat bad ki tiar kiba dang shem thymmai ban sumar ïa kiba pang bympong ha kane ka thaiñ shatei lammihngi jong ka ri India. Na ka liang u Director NEIGRIHMS Prof. (Dr.) Nalin Mehta u la ong ba ka NEIGRIHMS ka la sdang ban kiew sted ha kiba bun ki lad ai jingsumar khamtam ha ka jingpang bympong ha kane ka thaiñ bad kumjuh ruh sha kiwei pat ki bynta jong ka ri ban ai ka jingsumar ïa kiba pang bympong.
La ong ba ka jingpyndonkam ïa ka HIPEC ka la long teng kaba la jop ha ki por mynshwa bad mynta ba ka NEIGRIHMS ka la pyndonkam ïa kane ka kor sumar na ka bynta kiba bun ki nongpang la shem ba ka la ai ka jingmyntoi shibun ïa ki.
