Ka High Command kan sa shim rai halor ka jing kyrshan ka BJP ï’u kyrtong MP ka Congress na Tura

Shillong, Nailar 13 : U nongïalam ka NPP uba dei ruh u myntri ka tnad pule puthi ka jylla u Rakkam A Sangma mynta ka sngi Ba Ar u la ong baka high command jongka NPP kan sa shim rai halor ka jingkyrshan ka BJP ïa u kyrtong MP ka Congress u Saleng A Sangma na ka Tura Parliamentary Constituency ha ka Election Lok Sabha kaba dang shu dep shen.
U la kren ïa kane hadien ba u MDC ka Tura u Bernard N Marak ula pynbna paidbah ba ka BJP ka kyrshan ïa u Saleng A Sangma ha ka election MP Lok Sabha kaba la dep na ka Tura Parliamentary Constituency. U la leh ïa kane namar ba ka bye election ha ka Gambegre Constituency ruh ka la jan. U la ïathuh ba ka BJP ka ai jingkyrshan hadien ba u Saleng u pan jingkyrshan na ka.
“ Ngam kwah ban kynthoh ei ei halor kane ai ba ka High Command kan leh ïa kaba donkam” ong u Rakkam haba ïakren bad ki lad pathai khubor.
U la ong mynshwa la saphriang ki video kiba kynnoh ba ka NPP bad ka BJP ki ïadei kawei ka party hynrei mynta ki paidbah ki tip mano ba dei paralok shisha jongka BJP. Kane ka long kaei kaei kaba ym shym poi pyrkhat hynrei mynta ka la mih madan ka jingïadei jongki” ong u Rakkam.
U Saleng u la jop ïa ka Agatha ka kyrtong ka NPP da kaba tam bun bha ïa ka. U Rakkam u la ïathuh ba ka NPP ka khlem pan jingkryshan satia na ka BJP ha ka election Lok Sabha hynrei ka dei ka BJP hi kaba rai ban ym pynïeng kyrtong bad ban kyrshan ïa ka NPP katba ki nongïalam jongka bad ki nongkyrshan jongka ha Meghalaya pleng ki ai jingkyrshan ïa u kyrtong ka Congress. Mynta te ka la shai kdar.
U la ïathuh hadien ka election MP na ka liang u khlieh duh ka NPP u Myntri Rangbah ka jylla u Conrad K Sangma u la dep kren shai ba nangne shakhmat ka NPP kan ïakhun beit marwei ïa ka election kan ym treh da lei lei ruh ban ïateh paralok bad no bad no ruh ha ka por election. Wat la katta ruh kumba ka long mynta ka jingpyllait san shyieng bad ka BJP kan ym pat jia. Namar u la ong ba ka jingïoh pisa dang shen haduh 2500 klur tyngka na ka bynta ka MITP projek ka dei ka jingmyntoi ïa ka jylla lyngba ka jingïateh lok bad ka BJP.
Halor ka bye election ha Gambegre u la ïathuh ba ka NPP kan trei shitom bha bad mynta ruh ki paidbah ki la sngewthuh bad ïohi kaei kaba lieh bad kaei kaba ïong. Ka NPP kan pynïakhun ïa ka kurim jong u myntri rangbah ka jylla ka Mehtab Chandee Sangma.
Dang shen u Bernard u la ong ba u Saleng u la dei ban ai khublei ïa ka BJP ba ka khlem pynïakhun kyrtong haka election MP. U Saleng u dei ruh ban sngewnguh ba u khlem ïakhun kum u kyrtong shimet. Hynrei “ Ngam sngewthuh balei ba u Saleng u dang kren pyrshah ïa ka BJP namar ka dei ka BJP kaba pynjop ïa u. U Saleng da lade u la wan ïa kynduh ïa nga bad kyrpad ba ngin ym pynïeng kyrtong ne ba ngan ym ïakhun kum u kyrtong shimet ruh hynrei ban kyrshan ïa u ha ka election” iathuh u Bernard.
U la ïathuh ban da dei ba ïakhun ka BJP ka jingjop jongu Saleng ruh ka lah ban long hapdeng ka jingartatien ne lada tam ruh tang khyndiat eh. U la ïathuh ba ki nongbud ka BJP kim treh ban kyrshan ia ka NPP na kata ka daw u sa jop u Saleng.
Shuh shuh une u Myntri sorkar u la ong ba ka NPP ka long kaba la kloi ban pdiang sngewbha ïa ki lai ngut ki MLA ka Congress kiba thmu ban pynïasoh sha ka party. “ Ka NPP ka pdiang ïa kino kino kiba wan pynïasoh la ki dei ki nongïalam ne ki MLA. Ka long kaba sngewtynnad eh ban pdiang sngewbha ïa ki lada ka khubor ka long kaba shisha” ong u Rakkam.
Na ka liang jongu u la ong kat haduh mynta um pat ïoh jingtip la kita ki lai ngut ki MLA ka Congress ki don jingmut shisha ne em ban pynïasoh sha ka NPP.
“ Hooid ban shong ha ka liang pyrshah kam don jingmyntoi. Ka long kaba bha tam ban ïatrei lang namar ka kamram jongngi ka long ban shakri ïa ki paidbah. Ngi donkam ban shna ïa ki surok , ki skul, ki hospital bad kumta lada don lang ha ka sorkar kan kham suk ban ïoh ïa kine ki skhim. Teng teng ha ka saiñ pyrthei ïa kaba ïong hap ban pynlieh ruh. Kumta lada ki paralok ki wan pynïasoh kan long ka khubor kaba bha ïa ka NPP bad ïa ki ruh kumjuh” ong biang u Rakkam.
Dang shen ki la mih ki khubor ba ki lai ngut ki MLA ka Congress kiba thmu ban pynïasoh sha ka NPP ki dei u bah Charles Marngar, Dr Celestine Lyngdoh bad bah Gabriel Wahlang. Kane ka khubor ka saphriang ha ka por ba u President ka MPCC u ma Vincent H Pala u don ha USA. Ka NPP mynta ka don 28 ngut ki MLA lada wan pynïasoh sa kitei ki lai ngut ka la poi sha ka 31 ngut bad lada ka kwah ban synshar marwei ruh ka la lah mynta.