Ka Health Campaign ha Lad Rymbai ïa kiba don khñiang HIV bad kiwei ki jingpang

Khliehriat, Jylliew 13: Ka Meghalaya Aids Control Society ha ryngkat ka jingiatreilang bad ki bor Distrcit jong ka East Jaiñtia Hills District, kumjuh ruh bad ka ophis jong u District Medical Health Officer bad kiwei kiwei ki tnat, mynta ka sngi ka la pynlong ia ka prokram ha shnong Ladrymbai Dongwah, kane ka prokram ka dei kyrpang ban ialap ia ka jingdonkam ka koit ka khiah bad ka jingthmu jong kane ka Integrated Health Campaign, ka long na ka bynta kito ki briew kiba don ia u khñiang jingpang HIV.
Ha kane ka sngi ka MLA jong ka 5- Sutnga Saipung Assembly Constituency, ka kong Santa Mary Shylla, ka la long kum ka kongsan bad la ia don ryngkat lang ruh u Deputy Commissioner, East Jaiñtia Hills District, u Abhilash Banarwal, IAS, u Addl. Deputy Commissioner, East Jaiñtia Hills District, u bah J. Shylla, MCS, u EAC, u bah R. Brahma, ka Director Mih-myntdu Community Social Welfare Association (MCSWA), ka Dr (Mrs). J.N. Shullai bad u Deputy Director (Mainstreaming) Meghalaya AIDS Control Society, u bah A. M. Lanong lem bad kiwei kiwei ki riew rangbah.
Shuh, shuh ka jingthmu jong kane ka Campaign, ka long ruh ban wanrah ia kito kiba don ia u khñiang jingpang HIV sah ki jaka ai jingsumar ba kin ioh ia ki jingsumar bad ruh ban pynduh noh ia ka jingsngew kaba don ha ki, kata ka jingsngew shah peit beiñ, la ong ruh ba kane ka Integrated Health Campaign ka dei kawei na ki model kaba heh lane ka hybrid model ka ba pynlong ia kane ka screening bad ka Test ia ki paidbah,kaba lyngba ki health camp ban dup lah ban tehlakam noh ia ka jingsaphriang u khñiang jingpang.
Haba kren kum ka kongsan, ka kong Santa Mary Shylla, ka la pynpaw ka jingsngew khia namar ba ka East Jaiñtia Hills District ka dei ka wei na ki district kaba kiew bha kiba pang HIV, ka la ong ruh ba kane ka jingialap paidbah halor ka koit ka khiah ka long kaba donkam bha ban ai jingpynshai bad pynsngewthuh ia ki paidbah ba ki donkam ban leit leh ia ka HIV Screening bad kaHIV Testing, khnang ban dup tip ia ka jinglong ka met bad ka koit ka khiah, ka pynshlur ia ki paidbah ba ki dei ban mih sha khmat ban leh ia ka screening bad ka test ba kim dei ban sngew lehraiñ namar ka kaiphot jong ka tei ka test bad ka screening kan long kaba jar jar ka ba ym tip paidbah, ka la ong ruh ba kiba don ia utei u khniang jingpang HIV kin ioh ia ka jingsumar ei ka ba ym donkam ban siew pisa ha ki jaka ai jingsumar, ka la kyntu ia ki paidbah ba kin pynphriang ia kane ka khubor sha kiwei ruh.
Ka la ong ruh ba ki heh sorkar kiba na ka tnat ka koit ka khiah ki la trei bha ban pynbit pynbiang ia ki jaka ai jingsumar kiba don hapoh ka district bad ki la ai ruh ka jingshakri kaba biang ia ki paidbah
U Deputy Commissioner, u A.Banarwal, IAS, ruh u la ong ba ka East Jaiñtia Hills District, ka dei ka district kaba bun bha kiba pang HIV na ka 100 ngut ki briew kiba la wan ban leh ia ka test ki la don haduh 2.8 percent kiba ioh ia une u khñiang HIV Positive, ha kajuh ka por u la iathuh ruh ba ki don 2500 ngut kiba ioh HIV, kata tang kito ki ba la pyndep ia ka screening bad ka test katba ki dang don shuh sa kumba 4000 ngut kiba don ia u HIV ki bym pat shym la wan leh ia ki test.
U la ong ruh ba kaba biang eh ban leh ia ki screening bad ki test ka dei lyngba ka “Meghalaya AIDS Control Society khnang ba ka kaiphot kan long kaba jar jar bad kan tikhna ruh ka jingai jingsumar ia kito ki briew kiba don ia ka HIV ba kin im ka jingim kumba im lang kiwei pat, haba ban jur halor ka jingdonkam ban leh ia ka test, u Deputy Commissioner u la ong ba kane kan lah ban iada ia kiba ha iing ha sem bad kumjuh kan iada ia kiwei ruh ha ka imlang ka sahlang. I Dr(Mrs). J. N. Shullai, ka la pynshai shaphang kane ka jingpang HIV bad ong ba kane ka jait jingpang ka long kaba ym lah ban lap da kaba suk na kata ka daw donkam ban leh ia ka screening bad ka test ban dup tip shai bad ruh namar lada lap noh dang kloi ia une u khniang jingpang dang lah ban sumar, ka la kyntu ia ki paidbah ba kin shim ia kane ka kabu lyngba kine ki Health Camp ban leh noh ia ka Screening bad ka Test HIV, STD, STI, Hepatitis B, Hepatitis C, Tuberculosis bad kiwei kiwei ki jait jingpang.
U bah A. M. Lanong, uba dei u Deputy Director (Mainstreaming) Meghalaya AIDS Control Society, u la ai jingpynshai shaphang ki bynta ba kongsan jong kane ka Integrated Health Campaign bad u la kren ruh shaphang ka jingpang HIV/ AIDS.
Kiwei pat kiba la ai jingkren, ki kynthup u bah J. Shylla, MCS, u Dr. Dominic Shylla, District Medical & Health Officer East Jaintia Hills District bad kiwei kiwei Kum ka jingpynshlur ia kiwei, u Deputy Commissioner, u A. Banarwal, u la shim ia ka test bad bud pat sa ki heh sorkar
Hadien ka prokram ba la pynlong, ka la don ruh ka jingai dawai ei ia ki paidbah, ka Health Camp ha shnong Community Hall, Lad Rymbai Dongwah bad ha Lad Rymbai Datsympein Community Hall, ha Lad Rymbai B, Mooknor Community, ha kaba la leh ruh ia ka screening bad testing na ka bynta ka HIV, STD, STI, Hepatitis B, Hepatitis C, Tuberculosis bad kiwei kiwei ki jait jingpang ruh, ha kajuh ka por la pynrung kyrteng ia ki briew ha ka MHIS bad Aadhaar.