Ka Games Villages kaba kham phylla yn tei ka Meghalaya na bynta ka National Games 2027

Shillong, Nailur 30 : U Myntri Rangbah ka Jylla Conrad K Sangma ha ka sngi Ba-ar u la ong ba ka Meghalaya ka la pyntikna ba kan ïoh pynlong beit ïa ka National Games ha u snem 2027 bad ka jingpynkhreh na ka bynta kane ka lympung ïalehkai kaba heh tam ha ka Ri ruh ka la ïaid shakhmat mynta.
“Watla ka dang don bun ka kam ban pyndep hynrei kan ym don pat kano kano ka jingeh ïangi haba ïadei bad ki jaka ïalehkai na ka bynta kane ka lympung,” ong u Myntri Rangbah haba kren bad ki lad pathai khubor hadien ka jingïalang jong ka Kynhun Myntri.
U Myntri Rangbah u la pyntip ruh ba ka sorkar jylla mynta ka la shim da ka sienjam kaba kham phylla haba ïadei bad ka jingshna ïa ki Games Village lane ka jaka sah na ka bynta ki nongïalehkai lane ki nongpynïaid ïa ki jingïalehkai. Ki jylla ba pynlong ïa ka National Games ki hap ban pynlut bun bha na ka bynta ban shna ïa kine ki Games Village namar ki donkam ban pynbiang palat phew hajar ngut ki jaka sah.
“Ngin sa don da ka sien pyrshang kaba khampher bad kham phylla haba ïadei bad ki Games Village khamtam haba ngi mad ïa ka jingeh khyndiat ban pynbiang ïa ki jaka sah kum ha Tura bad ha Jowai katba ha Shillong ka la kham biang hi watla katta ngi dang donkam shuh,” u la ong.
Nalorkata, u la ong ruh, “Kaei kaba ngin leh ka long ba ngin kynthup lang ha ka Homestay Mission bad ka Games Village Programme. Halor kane ngin kyrshan pisa ïa bun ki nongtreikam lajong bad ki riew shimet ba kin tei ïa ki homestay ba 10 kamra ryngkat ki jingdonkam kiban ïahap bad ka jingdonkam jong ka National Games. Ka jingthmu ka long ba ïa kine ki homestay yn lah ruh ban pyndonkam kum ki Games Village hynrei haba ka lympung ïalehkai ka la kut ïa kine ki jaka sah yn sa bteng ban pyndonkam pat kum ki homestay ne ka jaka sah na ka bynta ki nongwanjngoh kai pyrthei.”
U ong ruh ba da kaba leh kumne, ka pisa kaba ki pynlut na ka bynta kane kan ym long lehnohei hynrei kan neh pynban kum ka nongmuna jong ka National Games.
Tangba halor ka jingtei ïa ki jaka ïalehkai, u MyntrI Rangbah u la pyntip ba ïa mynta hi un ym pat lah ban ïathuh lut namar ka jingtei ka dang ïaid shaid shaid ha kylleng ki jaka. “Hynrei ngi sngewskhem pat ba ngin lah ban pynlong ïa ka National Games kaba shongkun,” bynrap biang u Myntri Rangbah ka Jylla.