Ka FOCUS ka dei ka skhim kaba ïarap bha ïa ki shnong ha ki thaiñ nongkyndong: Conrad

Shillong, Jylliew 22: Kum shi bynta ban pynkupbor ïa ki shnong ki thaw bad ban kyntiew ruh ïa ka ïoh ka kot jong ki ka sorkar Meghalaya ka la sdang ban sam ïa ka pisa kumba T. 19 klur ka jingïarap pisa sha ki Producer Groups (PGs) hapoh ka prokram FOCUS (Farmers’ Collectivisation for Upscaling Production and Marketing Systems) program ha ka kylleng ka jylla. Na kane ka pisa kumba T. 8 klur la dep ban sam sha palat 4,600 tylli ki PG ha Garo Hills ha kaba kane ka long kum shi bynta na ka liang ka sorkar ban kyntiew ïa ki shnong ha ki thaiñ nongkyndong.
Ïa kane la pynbna da u Myntri Rangbah ka jylla ha ka sngi ba la buh ïa u mawnongrim jong ka Additional Secretariat Complex ha Tura.
Naduh ba la pyllait ïa ka FOCUS scheme ka la ïarap shibun bha ïa ka jylla kaba kynthup ïa ka thaiñ Garo Hills bad Khasi-Jaiñtia Hills. Na ka liang u Myntri Rangbah u la ïathuh ba ka pisa kumba T. 120 klur la dep ban sam sha palat 22,000 ngut ki Producer Groups, kaba kynthup ïa kumba 2.1 lak ki longïing. Ha kane ka snem kaba mynta ka jingmang pisa ka la long kumba T. 120 klur na ka bynta ki 22,500 tylli ki Producer Group kiba la ïoh ka jingkyrshan ha ka jylla kat haduh kine ki sngi. Ka jingmang pisa kaba shisnem ha ka 2025-26 ka la long T. 19 klur.
Na ka liang u Myntri Rangbah haba sam ïa ki cheque ha kane ka prokram u la banjur ba kine ki jingïarap kim dei tang kiba la ai sngewbha hynrei ki long ruh ban kyntiew ïa ki nongrep bad ban kyntiew ruh ïa ka ïoh ka kot ha ki thaiñ nongkyndong. Ka FOCUS kam dei tang kawei ka scheme kaba shipor; hynrei ka dei kaba pynkupbor ïa ki shong ki thaw.