Nongpoh, Jylliew 22: Ka Federation of Khasi Jaintia and Garo People (FKJGP) Nongpoh Circle ka la ïoh ban pynthymmai biang ïa ki nongkitkam jong ka hadien ba ka samoi treikam jong ki nongïalam barim ka la kut noh, ha ka jingïalang kaba la long ha ka sngi Saitjaiñ ha District Library, Nongpoh.
Ki nongïalam ba hakhmat jong ka FKJGP Nongpoh Circle na ka bynta ka samoi treikam jong u snem 2025-28 bala pynskhem ha katei ka sngi ki kynthup ïa u Samla Precious Khymdeit kum u President, George Weston Lyngdoh Vice President, Babitnamhiam Pamshong General Secretary lem bad kiwei kiwei.
Ïa kitei ki nongïalam ba thymmai jong ka FKJGP Nongpoh Circle la wan ban pynskhem bad pynbamsmai da u Bah Eldie N Lyngdoh General Secretary ka FKJGP sengkmie, ha ka jingdonlang u Bah Elton Cliff Warjri Senior Vice President ka sengkmie, Bah Luistar Lyngdoh President ka FKJGP NKHD, u Bah Ricky Majaw General Secretary bad kiwei kiwei ki nongïalam bad ki dkhot ka seng na ka them Ri-Bhoi.
U Bah Eldie N Lyngdoh haba kren ha katei ka sngi kum u kongsan u la ong ba kum ki dkhot ka seng kim dei ban rung sha ka seng da ka jingthmu kaba sniew bad kaba pynthohbria ïa ka seng hynrei ban long ki dkhot kiba sngewrit namar ka FKJGP kam ju hikai bakla ïa ki dkhot ban shim ïa ka kyrdan nongïalam bad ban iaid pynheh shadem, hynrei ban long ki dkhot kiba shakri da ka mynsiem kaba khuid ban ban long ruh kiba khreh haba don kano kano ka thma ne ka jingïaleh na ka bynta ka dawbah jong ka jaitbynriew, namar kum ki dkhot kim dei ban tieng ïa ka iing byndi na ka bynta ka jingbha bad ka jingsuk jong ka jaitbynriew bad ka pateng ban wan.
U la sneng bad kyntu ruh ïa kitei ki nongïalam ba thymmai ba kin shakri hok ïa ka kam bad ka lyngkor kumba la bynshet ha ki, khamtam ka Nongpoh ka dei ka headquarter jong ka Ri-Bhoi District, ba kum ki samla ki dei ban shim ïa ka jingkitkhlieh halor ki mat bad ki ishu bapher bapher kiba ktah ïa ka jaitbynriew hi baroh kawei.
