Shillong, Jylliew 6 : Ka Sngi ban pynneh pynsah mariang ne ka Environment Day kam dei ban kut tang shisngi hynrei ka dei ban long man la ka sngi baroh shisnem lynter, ong ka Deputy Commissioner ka East Khasi Hills I Kong Isawanda Laloo haba kren kum ka kongsan ha ka jingrakhe ïa kane ka sngi mynta ka sngi ha Donbosco Hall, Laitumkhrah.
ïa kane ka jingrakhe ïa kane ka sngi pynneh pynsah mariang la pynlong da ka ophis jongka DC, ka District Project Management Unit (MPMU) East Khasi Hills bad Meghalaya Basin Management Agency (MBMA).
Haba kren shuh shuh ha ka jingïalang na ka liang ka DC ka la ai khublei ïa baroh kiba la ïadon bynta ban rakhe ïa kane ka sngi pynneh pynsah mariang kaba la bteng baroh shi taiew. Ka la ïaroh ïa ki skul kiba la shim bynta ha ki jingïakob bapher bapher ba la pynlong da ka ophis bad kumno ba ki don ka bynta kaba khraw ba kin ïai pynsngewthuh ïa ka jingkordor jongka mariang kum kita ki lawei jongka jylla.
Namar ba kum ki bor synshar district ki sngew donkam haduh katta katta ban pynneh pynsah ïa ka mariang na kata ka daw ki rai ban pynïasnoh kti lang naduh ki shnong ki thaw, ki skul, kolej, ki seng niam bapher bapher ban pynlong da ki prokram bapher bapher ban ïada ïa ka mariang. I kyrmen ba lyngba ka jingïashim bynta lang jong baroh kan rah ïa ka khubor sha kiwei ban ïada ïa ka mariang bad pynneh ruh ïa ka jingkhuid jingsuba. Namar tang ka sorkar marwei kam lah da lei lei ruh khlem ka jingïasnoh kti lang jong baroh. I la ong ruh ba ka roi ka par ka ïa ïaid ryngkat ryngkat bad ka jingpynneh pynsah ïa ka mariang bad ka phang pdeng jong ka Environment Day mynta u snem ka long Environment Day only on Earth “ Living Sustainably in Harmony with Nature”.
I la ïathuh ba ka Meghalaya Polution Control Board kin sa pynbna ban ong “ em” ïa ka jingpyndonkam plastic bad kyntu ïa ki khynnah skul ruh ban rah ïa kane ka khubor sha kylleng namar ki plastic ki dei kiba ktah jur bha ïa ka mariang.
Ha kane ka sngi I DC i la sam ruh ïa ka khusnam bad certificate sha ki nongjop jongka jingïakob dro jingdro, thoh essay, ïatainia bad ter ter ba la pynlong da ka ophis DC. I la sam ruh ïa ki khusnam da ki lai tylli ki shnong kiba tbit ha ka Community Led Landscape Management Project (CLLMP) bad 3 tylli kiba tbit ha ka Meghalaya Livelihood and Access to Market Project (MLAMP). Ki lai tylli kiba ïoh ïa ka CLLMP ki long ka Weiloi Village Natural Resource Management Committee,Thainthynroh Village Natural Resource Management Committee bad Mawkynrew Village Natural Resource Management Committee. Kiba ïoh ïa ka MLAMP ki long Kyiem IVCS,Laityra CMC bad Mawkohmon. Kiba la ïadon ryngkat ha ka prokram kil ong D B Gunanka, Additional Project Director, CLLMP , Shri D Hynniewta, Project Director, DRDA, East Khasi Hills District bad kiwei kiwei.
