Ka Empathy Art Exhibition 2025 – “Nga Don Ryngkat bad Phi” ka prokram ha All Saints Hall
Shillong, Risaw 28: Ka Assam Rifles Public School bad ka Project Empathy (www.projectempathy.org.in) ki la pynkhreh ban pynlong ïa ka Empathy Art Exhibition 2025, kaba la buh ïa ka phang pdeng “Nga don ryngkat bad phi”, ka ban long naduh ka 29 haduh ka 31 tarik Risaw, 2025 ha All Saints Hall, Shillong.
Ka exhibition, kaba la da ka Assam Rifles, ka dei shi bynta jong ka sienjam kaba dang ïaid shakhmat ban kyntiew ïa ka imlang sahlang kaba kynthup lang ïa baroh bad kaba don ka jingsngewlem ha kylleng ka thaiñ Shatei Lammihngi. Ha kane ka interschool exhibition yn pyni ïa ki jingdro ba la saiñdur da ki samla pule na ki skul bad ki jaka pule ba kham halor ha nongbah Shillong, ki hynñiew tylli ki jylla ka thaiñ shatei lammihngi bad ka nongbah jong ka Ri. Ka exhibition ka long ka bym donkam jingsiew na ka bynta ki paidbah.
Ïa kane ka jingïalang yn plie paidbah da u Lat ka jylla u C. H. Vijayashankar ha ka 29 Risaw 2025 ha ka por 4:30 Janmiet.
Ha kane ka exhibition yn pyni ïa ki jingdro ba bun jait kiba pyni ïa ka sap ba kynthup ïa ki jingdro jong ki samla pule halor ka jingsngewlem bad ki phang pdeng jong ka imlang sahlang, ki postcard ba la thoh sha “U Briew Bym Ithuh,” “Ma Nag ha ki por ban wan,” bad “Ka Mei Mariang,” bad kumjuh ruh ïa ki poitri halor ka jingsngewlem, ka jingdro ha ki kynroh, ka kynroh jong ka jingïadei paralok bad ka kper jong ka jingsngewlem. Kan don ruh ki dur bad ka jingbatai shaphang ka kam ïathuh khana jong ki Naga da ka Project Empathy, ryngkat ki jingrwai, ki nuk kad natak bad ki workshop ba ïakren shaphang ka kam saiñdur.
Ki skul bad ki jaka pule kiba ïashim bynta ki kynthup ïa ka ARHS Lokra, ARPS Chieswama, ARPS Medgiphama, ARPS Shangshak (Manipur), ARPS Kohima, ARPS Keithelmanbi (Manipur), ARPS Agartala, ARPS Jorhat, ARPS Mantripukhri, St. Edmund’s School, AlokBharti Public School (Delhi), ARPS Khonsa, ARPS Somsai (Ukhrul, Manipur), ARHS Teliamura, Bethany Society (JyotiSroat School), Army Public School (101 Area), St. Mary’s School, Army Public School (Happy Valley), St. Anthony’s School, NIFT Shillong, Martin Luther Christian University, BDW International School bad ARPS Laitkor.
Haba kren shaphang kane ka sienjam, ka Vibha Lakhera, Nongseng ïa ka Project Empathy, ka la ong, “Ka Project Empathy ka don ha ka thong ban thaw ïa ka pyrthei kaba don tynrai ha ka jingkynthup lang, kawei kaba nud ban ïaid ha ka lynti jong uwei pat u briew.”
Ka Project Empathy, ka seng trei mon sngewbha, ka long ka nong sdang ban wanrah ïa ka jinghikai kaba pynshong nongrim ha ka jingsngewlem lyngba ki projek, ki workshop bad ki sienjam ba ïadei bad ka imlang sahlang kiba pynïasoh ïa ka jingsngewlem bad ka jingnang jingstad ha ka jingpule.