Lano yn long kata ka elekshon MDC? Kane kadei ka jingkylli ki paidbah ki kylli sharum shaneng. Ka daw ka long bay m ju kham jia koit ba ïa ki ïingdorbar ha Meghalaya yn pynjlan, lait noh shisien lano. Ka daw ba ki kylli kumne kadei namar ba ka la pynjlan ïa ka samoi treikam ne ka teram jong ka KHADC bad JHADC sa hynriew bnai na ka por ba ka la kut treikam ha u bnai Lber mynta ka snem.
Ka jingpynjlan ïa ka samoi trei jong kine ki artylli ki ADC ha Khasi bad Jaiñtia kadei halor ka nongrim ba ka don ka jingpynbeit ne pynbiang thymmai ïa ki Constituency ha kine ki artylli ki District Council lane kata ka delimitation. Kumba ka paw ka KHADC ka ladep ïa ka delimitation lane ka Committee kaba leh ïa ka Delimitation ka la dep bad ai ïa ka report sha ka EC bad ka EC ka la wanrah haka dur jong ka Bill haka Dorbar kaba dang shu dep. Tangba ka Dorbar kam pat pdiang bad ka la phah ïa kane ka Bill sha ka Select Committee kaba kynthup ïa ki 4 ngut ki MDC.
Hynrei katkum ka jingtyrwa na ka Committee kumba la paw ha ka Bill, ka don ka jingpyshah na ki katto katne ki Shnong kiba la shah rah na kawei ka Constituency sha kawei pat. Kum ka Mawlai Mawroh kaba la shah rah na Mawlai sha Jaiaw Constituency. Ki paidbah Mawroh ki la pynpaw ba kim ïahap bad kane ka jingpynkynriah na Mawlai sha Jaiaw. Nalor ka Mawlai Mawroh, ki shong ha Sor kiba khampaw kiba la shah pynkynriah kadei ka Mawpat kaba la shah rah na Mawlai sha Mawkhar- Pynthorumkhrah Constituency, namar ba ha ka Assembly Constituency kane ka Shnong ka hap ha Pynthorumkhrah Constituency.
Hynrei ka la mih ka jingkynnoh ba kane ka delimitation kam dei na ka bynta ka jingbha jong ki shnong ki thaw ne ki paidbah, hynrei na ka bynta ka jingmyntoi jong ki MDC kiba don ha ka bor. Haduh katno kane ka long kaba shisha kan shong ruh ha ka Select Committee, namar ba ka Select Committee kan hap pan ia ki jingai jingut ne ki jingpynsngew halor kane ka Bill kaba la wanrah ha ïingdorbar.
Kaei kaba ki paidbah ki ïakren bad wat napdeng ki MDC ruh ka long ba ym dei shuh ban pynjlan hadien ba la kut ka jingpynjlan kaba nyngkong, namar kaba nyngkong ruh kadei kaba la shu leh khlem da don ka nongrim kaba biang, namar ba ïa ka Delimitation Committee dang thung dang u snem 2023 khyndiat bnai shuwa ban kut jong ka trem jong ka Council. Kiba bun ki kynnoh ba kadei tang ka buit ban ioh daw ban pynklan ia ka Council namar ba ki don ki MDC kiba sheptieng ban leit noh sha ka elekshon. Dei na kane ka daw ba bun ki paidbah ki sdang ban khot ïa ki MDC ba mynta ba kidei ki MDC ba shisieh, namar ka samoi ba jied ki paidbah ïa ki, ka la kut.
Ha kaba ïadei bad ka Delimitation imat kan shim por ruh ban ïoh ïa ka jingmynjur, namar ba ki shnong kim hun kan mih ka jingeh kaba khraw khamtam lei lei sha JHADC, ha kaba la kynnoh ba ka jingphiah kadei kaba la shu leh pathar ym na ka bynta ka jingbha jong ki paidbah, hynrei la leh na ka bynta ka jingmyntoi hi jong ki MDC.
Hadien ba ka Select Committee ka la wanrah ïa kane ka Report, ka Council kan hap ban khot biang ïa ka Dorbar ban ïakren ìa ka Report jong ka Select Committee. Ka dorbar jong ka KHADC ka dang shu dep bad ym tip la kan khot ne em ïa ka Special Session ban ïakren tang ïa ka Report jong ka Select Committee. Nalorkata hadien ba la mynjur da ka ïingdorbar jong ka Council hap ban phah pat ïa ka Bill sha ka sorkar jylla ba kan peit bniah, la kane ka Bill kaba mut ka jingpynbeit thymmai ïa ki Constituency ka KHADC ka biang ne em.
Kaba mut hi ba kan dang shim por bad ka jingkylli jong ki paidbah lano kan long ka elelshon MDC kan dang dei ka jubab kaba jwat bad kiba lah ban jubab ïa kane dei tang kiba don ha ka por, hynrei na ka liang u paidbah hi uba dei u nongjied ne u nongpynlong MDC ïano re ïano u la sngewdei ba dei ban pynlong noh ka jingïajied da ki MDC kiba thymmai.
