Ka elekshon MDC kan long ha u Rymphang, lada ym rah ïa ka ishu Khyrnit ba Hynriew ha Parliament

Shillong, Naiwieng 02 : Ka elekshon MDC ha Khasi Hills Autonomous District Council (KHADC) kumjuh ha Jaiñtia Hills Autonomous District Council (JHADC) ka lah ban long noh ha u Rymphang jong u snem ban wan lada jia ba ka sorkar India kam rah shuh ïa ka jingpynkylla thymmai ïa ka Khyrnit ba Hynriew ha Parliament, ong u Deputy Chief Executive Member ka KHADC, Bah Pynshngaiñ N Syiem.
Haba kren bad ki lad pathai khubor u Bah Pynshngaiñ uba dei ruh u MDC ka Mawkhar – Pynthorumkhrah u la ong, “Kumba ka paw hi i kumba ka sorkar India kam da kyrkieh than ban wanrah ïa ka jingpynkylla thymmai ïa ka Khyrnit kaba Hynriew ha Parliament. Tangba ym lah pat ban tip ba ïoh ki wanrah kyndit kyndit kumba ki leh ïa ka Women’s Reservation Bill ha Parliament.”
Nalorkata, u ong ruh ba kim lah satia ban batai lypa la kin pynjlan biang neem ïa ka samoi treikam jong ki Council lada jia ba ki wanrah ïa ka jingpynkylla ha Parliament. “Hynrei halor kane ka bynta ruh ka shong ha ka sorkar India ban shim ïa ka rai ba khatduh
U Bah PN Syiem uba dei ruh u Deputy Chief Executive Member ha KHADC u la pynpaw ba ka jingpynjlan biang ïa ka ilekshon leh-se kan nym don shuh wat lada ka Sorkar India ka rah ïa ka amendment ha Parliament, hynrei ka shong ha ka rai ba khatduh pat jong ka Sorkar India.
“Mynta ka shong ha ka sorkar pdeng kumno kan rai ba kan leh na ka bynta kito ki District Council kiba ka samoi treikam ka la kut,” u la bynrap biang.
Katkum ka jingong jong u, lada jia ba ka elekshon MDC ka long noh ruh kim pat lah ban tip la kin dang bteng da ki constituency ba rim ne kin treikam noh da kaba yn phiah thymmai shwa.
Kumban shu pynkynmaw, ka kynhun jong ki district council ba don ha ka thaiñ shatei lam-mihngi jong ka ri ki la dep ban dawa na ka sorkar India ban wanrah noh ïa ka jingpynkylla ïa ka Khyrnit kaba Hynriew. Kane ka kynhun ki CEM jong ki ADC na kane ka thaiñ ki la dep ban wan kynduh ruh wat ïa u Myntri Kampohiing ka Ri, u Amit Shah ha nongbah Delhi ban kyrpad ba un wanrah noh ïa katei ka jingpynkylla ha ka Dorbar Tlang jong ka Parliament kaban long ha u Nohprah mynta u snem.
Dang shen ki riewshemphang halor ka elekshon ki ïathuh ba lada jia ba lada ka jingwanrah ïa ka Khyrnit kaba Hynriew ha Parliament ka ïaid shakhmat khlem artatien kan don biang ka jingpynjlan ïa ka samoi treikam jong kitei ki Council la kumno kumno sa shisnem.
Kane ka jingpynjlan ka long ban ailad pat na ka bynta ka jingpynkhreh thymmai ïa ki constituency namar ha KHADC na ka 30 ngut kaba don mynta ki MDC ba shu jied kan kiew sha ka 37 ngut katba ha JHADC pat na ka 30 ngut kaba don mynta kan kiew sha ka 32 ngut.
Lah ruh ban kdew hangne ba ka samoi treikam jong kine ki council kin kut ha u Lber jong u snem 2025 hadien ba la pynjlan arsien ïa ka samoi treikam jong ki na ka daw ka jingpynbeit thymmai ïa ki constituency.