Ka elekshon MDC kam slem shuh pynstet ban wad kyrtong : Vincent H Pala

Shillong, Naitung 06 : U President jong ka Meghalaya Pradesh Congress Committee (MPCC), Bah Vincent H Pala ha ka sngi Saitjaiñ u la kyntu ïa ki nongïalam jong ka party ha ki distrik bad ha ki block ba ki dei ban pynstet ban wad kyrtong noh naba ki ïohsngew ba ka elekshon MDC ka lah ban long noh mynta u snem lane ha ki sdang jong u snem ban wan.
Haba kren ha ka jingïalang pynkup burom ïa u MP ba thymmai ka Congress na Tura, u Saleng A Sangma, na ka liang u President u la ong, “Kumta ki nongïalam ka party kum ha West Khasi Hills, West Jaintia Hills, East Jaintia Hills bad kiwei kiwei lada phi la ïoh ïa ki kyrtong phah noh ïa ka kyrteng bad kiba ym pat don pat dei ban wad noh.”
Shuh shuh u ong ruh ba ym pat donkam satia ban pynbna ïa ka kyrteng naba ïa katei ka kam yn sa leh da ki bor bahalor. U ong ruh ba ka kam kaba nyngkong ka long ban phah na ki block sha ki distrik bad nangtei pat sha ka state.
“Bun ki party ki la don lypa ïa ki kyrtong kumta kim pat khih khohreh ban wad kyrteng.Te donkam namarkata na bynta jongngi ban wad noh ïa ki kyrtong.”
Tang ha KHADC, ka Congress ka la jop bun ngut bha ki MDC ha ka samoi ba la dep ha KHADC hynrei mynta pat ki don sa tang katto katne ngut hadien ba bun ki la leit ban pynïasoh sha kiwei pat ki party.
Kumba ka long mynta hi, ïa ka elekshon MDC ha KHADC la pynjlan shwa na bynta hynriew bnai hadien ba ka Delimitation Committee kam pat lah ban aiti ïa ka kaiphod ban pynbeit ïa ka jingheh jingrit ki constituency kiba hap ha u pud u sam jong ki constituency ka KHADC.
Ha kajuh ka por u President ka party u la kyntu ïa ki nongïalam jong ka Congress ha rilum Garo ba kin ïaid shakhmat ban pynkhreh pat na bynta ka elekshon shiteng samoi ha Gambegre hadien ba u MLA ka party na katei ka constituency u la shah jied noh kum u MP ba thymmai jong ka Tura Parliamentary constituency.
“Mynta ngi la khot aplikeshon na kito ki kyrtong kiba kwah ban aireng ha kane ka elekshon shiteng samoi kaban sa long ha ki khyndiat bnai ban wan,” u la ong.
U President ka party u la ong ruh ba kane ka elekshon shiteng samoi kadei kaba shongshit naba baroh ki party ki phaikhmat lut sha katei ka constituency kaba la shong thylli hadien ba u MLA jong ka, u Saleng A Sangma u la shah jied noh kum u MP ba thymmai ka Tura.
Nalorkata, u ong ruh ba katkum ka jingtip ba ki ïoh, u Myntri Rangbah ka Jylla, Conrad K Sangma u la thmu ban pynieng da ka kurim na ka party NPP, nangta na ka TMC pat u Myntri Rangbah ba rim Dr. Mukul Sangma u thmu ban pynieng da ka para kynsi kaba dei ka kurim jong u Zenith Sangma Myntri barim ka jylla.
“Baroh baroh ki phaikhmat lut shane mynta la ka long naduh ki Myntri Rangbah barim, Myntri Rangbah ba mynta bad Myntri Rangbah ban sa shimti,” bynrap biang u President.