Shillong, Risaw, 22: U nongïalam jong ka National People’s Party (NPP) u Marcuise N Marak uba long ruh u Myntri Sorkar u la ong ba ka jingslem ban siew ïa ka tulop sha ki nongtrei jong ka Garo Hills Autonomous District Council (GHADC) kan ym ktah satia ïa ka National Peoples Party (NPP) ynda la pynlong ïa ka elekshon.
Ha ka jingïakren bad ki lad pathai khubor ha ka sngi Balang, u Marak u la ong ba ka NPP kaba lamkhmat ïa ka Sorkar ka la ïaleh katba lah ban pynbeit ïa ki jingeh, ha kaba bun na ki nongtrei ki la leit phai biang sha la kam.
“Ki la sdang ban pynkhreh ïa ki bill bad kiwei kiwei. Tang shu dep pynkhreh ïa ki bill, yn sa siew pisa sha ki (nongtrei),” u la pynthikna.
U Marak u la pynpaw ruh ïa ka jingkular jong ka NPPP ban don ryngkat bad ki paidbah manla ka sngi, da kaba ong, “Ngi don 24 kynta bad ki paidbah. Ngi long kiba la pynkhreh ban ïakhun ïa kano kano ka elekshon.”
Ha kaba ïadei bad ka jingpynkhreh ïa ka elekshon ha GHADC, u Marak u la pynbna ba ka party ka la ai jingtip ïa ki kyrtong kiba thmu ban aplai tiket na ka party, ha kaba ka tarik ba khatduh ban pdiang ïa ki aplikeshon kan long ha ka 14 tarik, Naiwieng.
Ka kyndon jong ka party ban jied ïa ki kyrtong kan long katkum ka “jinglah ban jop,” ha kaba ki jingai jingmut jong ki nongïalam kiba na shapoh kin don ka bynta kaba kongsan.
“Ka kyndon jong ngi kan long ka jinglah ban jop. Kan shong ha ki nongtrei ha ki shnong. Ngin sa pan jingshai na ki nongïalam ha ki shnong bad ngin sa sngap shwa ïa ki,” u la ong.
U Marak u la bynra ruh yn bishar ruh na ka jingïaineh ha ka party, hynrei ka jinglah ban jop ka dei ka mat kaba hakhmat eh.
Haba kylli, u Myntri u la ong, “nga dang ap ïa ka kaiphod namarba nga dang shu shong jingïalang bad ki dkhot jong ka komiti mynshi sngi bad nga la bthah ïa ki ban don ka jingïalang bishar bniah manla ka sngi kut taiew kumta hadien kata ngin sa lah ban tip katno ngut (ki kyrtong ki ïakhun ban ïoh ïa ka tiket). Ngi dang ai ïa ki phorm sha baroh ki kyrtong kiba thmu ban ïakhun.”
Une u nongïalam ka NPP u la pynpaw ïa ka jingsngewskhem ba ka party kan ïoh pdiang bun ki aplikeshon na ki kyrtong kiba thmu ban ïakhun, kynthup ïa ki kynthei bad ba ka party kan ai ïa ki phom sha baroh ki kyrtong.
U la kdew ruh ba ka don ka jingpynkiew khyndiat ha ka bai aplikeshon kaba T.5 hajar ha kane ka kynti, ïa kaba yn pyndonkam da ki ophis district.
