Ka Dyspraxia, Dysgraphia, ka dei ka jingshitom kaba kham pher, ong ki stad ka Developmental Coordination Disorder (DCD). Kane ka jingshitom ka ktah ïa ka jingtreikam ha ka khlieh kaba neh shirta ka jingim. Ka dei ka jingpang kaba shem jingeh ban lap, sngewthuh wat ban ai jingsumar pynhiah, bad bunsien la ju bakla bad kiwei pat ki jingpang kiba ktah ia ka jingtreikam jong ka khlieh.
Kito ki briew kiba don kane ka jingpang ki dei kiba kynduh jingeh ban khih ban ksar, ban ai rai, ban sngewthuh bad ka ktah jur ïa ka pyrkhat pyrdaiñ bad bor kynmaw. Kane ka jingpang ka ktah ruh ïa ka bor met bad ka jingtreikam ka jabieng. Ha ki por mynshuwa kane ka jingpang la ju tip kum ka clumsy child syndrome bad minimal brain damage.
Ki dak jingshitom halor ka dyspraxia: Kito ki briew kiba don kane ka jingpang ki shem jingeh ban bat ki tiar. Ki don napdeng jongki kiba shah ktah ha kane ka jingpang, ki ju jia ka jingpynhap bad pynpait ki tiar ki tar bad pynhap bad lynthaw ïa tiar. Yym baroh kiba don kane ka jingpang ki pyni ïa kane kajuh.
Kito ki briew kiba don kane ka jingpang dyspraxia, ka jingleh kulmar ba bunjait ha kajuh ka por ba donkam ka met bad ka bor jabieng ki shem jingeh shikatdei. Ki shem jingeh ban bat ïa ki tiar ha kajuh ka por ha baroh ar tylli ki kti jong ki, ban pule bad sngap ha kajuh ka por bad ka bor sngewthuh ka bor kynmaw. Ki kynduh jingeh wat ban ïaid bad kren ha kajuh ka por kum kito ki briew kiba ïoh ïa ka jingpang biej. Ym baroh ki briew ki lah ban leh bunjait ki kam ha kajuh ka por hynrei kine ki briew kiba don kane ka jingpang wat ki kam kiba suk tam ruh ki shem jingeh ban leh.
Kine ki briew kiba don kane ka jingpang ki dei kiba kynduh jingeh halor ka ïaid ka ïeng jong ki. Ki shem jingeh ban ïaid beit ha ka ka lynt la kum kito menbuaid bad ki klet ïalade ba ki don ha lynti. Kane ka jingpang kam ktah satia halor ka jinglong stad jong u briew, hynrei ka ktah pat halor ka jinglah bor ban shimki lad jinghikai. Kum kine ki briew ki shem jingeh ban sngewthuh halor ki jingai jingmut, bad ban buh jingkynmaw ïa kiei kiei kiba ki ïoh jinghikai.
