Ka Dwar Jingkhiah ha Laitmawsiang, ka jaka khem met khem phad da ki dawai kynbat bad jingstad tynrai

Shillong, Naiwieng 09 : Ka Grass Root Shillong, ka synjuk kaba don ïa ka jingangnud ban kyntiew bad pynneh pynsah ïa ki rukom jingtrei bad jingstad tynrai nalor kiwei pat, ha ka jingïalam ka Kong Mayfreen Ryntathiang, President, ha ka 06 tarik u Naiwieng, 2024, ka la plie paidbah ïa ka jaka khem met khem phad lane ka Khasi Traditional Spa kaba la ai kyrteng ka Dwar Jingkhiah ha ryngkat ka jingstad mynbarim lem ki dawai kynbat ha ka shnong Laitmawsiang kaba hapoh ka Khatarshnong-Laitkroh Community and Rural Development Block, East Khasi Hills District.
Ïa kane ka jaka khem met khem phad ban pynjahthait bad pynaram nalor kaba pynkoit na ki jingpang jingshitom ha ka met la plie ha ka jingïadonlang u Bah Pynïaid Sing Syiem, Chief Executive Member ka Khasi Hills Autonomous District Council (KHADC) kum u Kongsan, u Bhanu Prakash Verma, General Manager, Guwahati Regional Incharge ka SIDBI kaba bei tyngka ïa kane ka projek, u Bah Jiwon Riahtam, Sordar ka shnong Laitmawsiang, ki nongkitkam ka Grass Root Shillong lem ki nongshong shnong.
Ka jingthmu ha lyndet ka jingplie ïa kane ka jaka khem met khem phad ka long ban kyntiew ïa kane kam khnang ba kiba don ïa ka sap ne ka jingstad tynrai kin lah ban sam lang ïa ka sha ki khun samla ba kan long pat ka lad ïoh kam ïoh jam ban pynim ja ïalade. Ïa mynta kane ka jaka yn pynïaid da ka Grass Root ha ka jingïatreilang bad kiba tbit ha katei ka kam kiba la ioh jingithuh da ka KHADC kum u Bah Morton Khongjliew bad kiwei pat na katei ka thaiñ.
Lah ban kdew hangne ba ka shnong Laitmawsiang ka dei ka shnong kaba khring bha ïa ki nongwan jngohkai pyrthei da ka jingdon ka Park kaba la tip kum ka Bri Ki Synrang ha kaba u don u Mawdohnud nangta ka jaka pynlang um kaba kylla long ka jaka jngohkai nalor kiwei pat bad kumta la khmih lynti ba ki nongwan jngohkai pyrthei kin wan ban phah khem met khem phad ïalade ha katei ka jaka.
Haba kren ha ka jingïalang kum u kongsan, u Bah Pynïaid Sing Syiem u la ong ba kane ka sienjam jong ka Grass Root Shillong ka dei kaba ïahap bha bad ka rukom pyrkhat ka Council kata ban pynneh pynsah ïa ka rukom sumar tynrai da ki dawai kynbat. U la ong ba ka jingïatreilang hapdeng ka shnong bad ka Grass Root Shillong kan plie lad ïa ki khun samla ban ioh ka lad ban ieng ha la ki kjat ban pynim ïalade.
U la ong ba da ka jingwan ki nongwan jngohkai pyrthei sha kane ka jaka ka lah ban plie ka lad ïa kiba pyntbit ïalade ha ka kam khem met khem phad ba kin lah ban poi sha kiwei pat Jylla bad jaka ban leit sumar ïa kiba donkam. Da kaba pynpaw ka kitbok kitrwiang ïa ka Grass Root, u la ong ba kane ka sienjam kan plie lad plie lynti ïa kiwei pat ha ki bynta bapher bapher ka Ri Lum Khasi.
Katba na ka liang u Bah Jiwon Riahtam, Sordar ka shnong u la ong ba ki don bun ngut ki riewrangbah ha katei ka thaiñ kiba sumar khem met khem phad bad da ka jingplie ïa kane ka jaka kan nang pynjanai ïa kane ka kam bad ba ki khun samla kin ioh jinghikai.
Na ka liang ka Kong Mayfreen Ryntathiang, President ka Grass Root Shillong, da kaba pynpaw ba kane ka dei ka sienjam ba nyngkong, ka la ong ba kum ka Synjuk ka don ïa ka jingangnud ban pynïar ïa ka jingtreikam ha kylleng ki District ka Jylla.