Shillong, Jymmang, 06: Ka Meghalaya Pradesh Youth Congress (MPYC) ha ka sngi Thohdieng ka la sangah tyngeh ïa ka MLA ba la shah sospon ka Dr. M. Ampareen Lyngdoh halor ka jingkynthoh pyrshah ïa u President jong ka Meghalaya Pradesh Congress Committee (MPCC) u Bah Vincent H. Pala.
U kyrwoh ba la phah da u President ka MPYC u Samla Adrian L. Chyne Mylliem u la ong ba ka Seng kam sngewphylla ba ka Dr. Ampareen kan dang kulmar jingmut halor ka kyntien ‘Gharwapsi” bad ‘double standards”
“Kaba pynlyngngoh ka long ba kumno ka MLA ba la shah sospon kan leh arsap,” ong une u nongïalam ka Seng.
“Ka Dr. Ampareen mynba ka la phet na ka Congress ha u snem 2009 bad tang hadien katto katne ka la shet kylla hapoh shi snem sa ïa ka UDP bad leit phai biang sha ka Congress. Lada kane kam pynpaw ïa ka jinglong arsap jong ka tang na ka bynta ban ïoh bor bad ïoh shuki, kan dei kaei pat? la pynkynmaw ka seng.
“Ka long kaei kaei kaba sngewsih ban ïohi ba ka briew kaba la long ka Myntri Sorkar bad don hapoh ka Party (Congress) da ki snem kan dang kwah bor shuh shuh da kaba pynmih ïa ki jingkynnoh ba lamler pyrshah ïa u President ka MPCC. Ki jingkren jong ka pyrshah ïa u President ka MPCC ka pynpaw ïa ka jingdukha mynsiem namarba ym shym la ailad ïa ka ban leh ïa kino kino ki kam katkum ka mon bad ka jingkwah jong ka hapoh ka Party da kaba ïaid lait ïa ki kyndon jong ka riti treikam ka Party,” la kynthoh shuh shuh une u nongïalam ka Seng.
“U President ka MPCC ha ka jingshisha u la pyndep ïa la ka kamram katkum ki kyndon bad katkum ka lynti ba u nongïalam u dei ban leh. U la pynbeit ïa ki kynrum kynram hapoh ing bad u la trei shitom da kaba leit sha ki paidbah ban pynkhlaiñ ïa ka party ha ki Block khnang ba ki nongtrei jong ka party kin dup sngap ïa ka sur jong ki paidbah bad ban kren ruh ïa ki jingeh ba ki paidbah ki ïakynduh,” la ong shuh shuh u kyrwoh na ka Seng.
“Kane ka dei nongrim ba ka party ka bud. Ngi pyrshang ban sngap ïa kaei kaba ki paidbah ki kren shwa ba ngin shim ïa ka rai bad ngi hap ban pynthikna ba ngin ïoh ïa ki briew kiba lah ban trei ïa ka kam. Hato ka don jingbakla mo halor kata? la buh jingkylli ka Seng.
“Ki paidbah nongshong shnong ka jylla ki donhok ban ïoh ïa ki nongïalam kiba lah ban plie lad ha ka ïohkam ïohjam, ban ïada ïa ka khyndew ka shyiap, ban ban pynjanai ïa ka trei ka ktah khlem da ïapein ïa ki kyndon treikam ba la pruiddak da ki nongïalam kiba la leit noh. Ka Congress hapoh ka jingïalam jong u Bah Pala ka la pynpaw shai ïa ka thong ban leit sha u paidbah bad ban kyntiew ïa ki paidbah naduh tynrai, ban ïa kaba pynsngewbha ïa ki kattno katne ngut kiba rhah tang ban ïohbor,” u la ong.
“Ngi kwah ban ïaiban hangne ba ka jingkhang jong ka MPCC ka plie borabor na ka bynta kito kiba kwah ban wan phai biang,” ong u kyrwoh.
