Nongstoiñ, Naiwieng 24: Ka jingithuh jong ka Khasi Hills Autonomous District Council ïa ki dorbar kur hapoh ka bri u Hynñiewtrep, ka la long kum ka stieh kaba skhem ïa ki dorbar kur kiba la dep ban ban ithuh bad mynjur da ka Council ba ki dei ki jait Khasi paka.
Kumta na ka bynta ban nang pynkhlaiñ shuh shuh ïa ki dorbar kur ka Synjuk ki Rangbah Kur kiba don ha West Khasi Hills, kin pynlong ïa ka jingïakynduh lang ha Nongstoiñ ha ka sngi saitjaiñ ban wan kata ha ka 29 tarik jong une u bnai.
U bah Dmikstar Lyngdoh Nonglyngkien haba pyntip ha u nongthoh khubor, u la ong ba ha katei ka jingïakynduhlang yn pynlong ha MECOFED Hall New Nongstoiñ bad kan sdang naduh ka por 10:30 baje mynstep.
U la ong ruh ba ki don shibun ki synjuk ki mat kiba donkam ban ïatai ha katei ka sngi bad ka mat kaba kham khia, ka long halor ka mokotduma kaba la ai da ka kynun ai jait kpa kaba la tip kum ka Syngkhong Rynpei Thymmai.
U la ong ruh ba ha katei ka sngi la khot la wer ïa baroh ki rangbah kur la ki dei kiba la dep Register ha KHADC ne ki bym pat Register ruh ba kin ïa wan ryntih khnang ba ka kam kan long kaba jop.
