Shillong, Nailur 22: Ka Synjuk Ki Rangbah Kur Ka Bri u Hynñiewtrep kan pynlong ïa ka Dorbar Bah III ha Dinam Hall, Jaïaw Pdeng ha ka 27 tarik Nailur 2025 da kaba wer ïa baroh ki khlieh rangbah kur jong ki kur baroh ha Rilum Khasi Jaiñtia ban ïasnoh kti da ka ba wan sha kane ka Dorbar Bah ban ïatai ïa ki mat ki ba donkam ha ka ba pynneh pynsah ïa ka riti kheiñ kur kheiñ na ka kmie.
U khlieh rangbah jong ka Synjuk, u Bah R L Kharpran u la maitphang ïa ka jingthmu jong ka synjuk ha ka ba pynsngewthuh paidbah ïa ka jingdonkam ban ri kyndong ïa la ki riti dustur tynrai. Na ka liang jong u saiñpynïar Bah Raphael Warjri u la kren mardor ïa ka thymmei longkur longkha ha ka imlang sahlang Khasi bad u la kdew ruh ïa ki nongrim ki ba shongkhia jong ka jingstad ki longshwa manshwa ban seng ïa ka jait ka khong na ka kmie ka ba pun ba kha bynriew.
Kiwei kiwei ki para rangbah kur kiba dei ki dkhot nongkitkam ki kynthup ïa u Bah P. Syiem, symbud khliehrangbah, Bah Will Shylla, bad Bah J L Khongshei ki dkhot rangbah ha ka sengkmie ki ba la pynsawa ïa kajuh ka sur ban ha ka ba yn ïakhun ban kyrda ïa ki jingpyrshang ban kylla bad tynneng ïa ka pyrthei bad ban leh bym suitñiew ïa la ka tynrai. Kumta baroh ki la ïa tylli lang da kawei ka jingthmu ban kyntu ïa baroh ki rangbah kur jong ki kur baroh ha Rilum Khasi Jaiñtia ba kin synrop lang ban wan sha ka Dorbar Bah III jong ka Synjuk Ki Rangbah Kur ban ïatai sani halor ka phang ‘Ka matti u Mynbarim ngin ïai pynim, ïa jaitbynriew ngin ïai kyrsiew’.
