Ka donkam ka jingïatreilang ban wanrah ki kam pynroi ha ka thaiñ shatei lammihngi: Timothy D. Shira

Shillong, Risaw 18: Ka jingplie paidbah ïa ka North East Integration Rally (NEIR) 2026 kaba la long ha Shillong ha ka janmiet sngi Thohdieng, ka la long ka dak ka jingsdang kaba thmu ban pynkhlaiñ ïa ka kolshor bad ka jingïalong tylli jong ki jylla kane ka thaiñ shatei lammihngi.
Ha kane ka prokram NEIR 2026 la sakhi ïa ka jingshim bynta ba shitrhem jong kiba shah khot sngewbha, ki nongthaw aiñ, bad ki dkhot jong ka imlang sahlang kiba wan lang ban rakhe ïa kane ka mynsiem jong ka jingïalong kawei ha ka thaiñ.
Haba kren ha kane ka sngi, u Myntri ka tnat jngohkai u Timothy D. Shira u la ïaroh ïa kiba la pynlong ïa kane ka prokram kiba la sdang ïa kane ka kam kaba don jingmut shibun. “Ka long kaba kongsan na ka bynta jong ngi baroh ban ïatreilang ban wanrah ki kam pynroi ha kane ka thaiñ jong ngi,” u la ong, da kaba ïaroh ruh ïa ki jingpyrshang ka KRC Foundation khamtam u nongseng u Biswadeep Gupta uba la sdang ïa kane ka kam.
U Myntri u la pynpaw ruh ïa ka jingïar ka lad jong ki nongshong shnong kane ka thaiñ shatei lammihngi, da kaba banjur ïa ka jingdonkam ban kyntiew ïa ki sap ki phong bad da ka jingïatreilang ban pynïaid shakhmat ïa ki kam. U la pynthikna ruh ïa ka jingkyrshan na ka tnat Tourism na ka bynta kane ka rally ban wan, kaba la buh por ban long ha u bnai Kyllalyngkot, 2026. “Nga kyrmen ba kiba bun ki briew na kylleng kane ka thaiñ shatei lammihngi ba kin ïashim bynta bad ban pynlong ïa kane ka rally kaba jop,” u la bynrap.
U MLA bad u nongkyrshan ka NEIR u Bah A. L. Hek, uba la kren ha kane ka sngi, u la ai ka jingkitbok ïa kiba pynïaid ba kin jop ha ki kam bad pynpaw ruh ka jingdonkam jong kane ka prokram ban wanrah ka jingïasngewthuh jingmut bad ka jingïalong kawei hapdeng ki jylla kane ka thaiñ shatei lammihngi.
Kiwei kiba la kren ki kynthup ïa u Joydeep Gupta, co-chairman of FICCI’s Assam State Council, Prof. (Dr.) Sukamal Deb, bad Col. Shanti Singh (Retd), kiba la sam ïa ki jingai jingmut jong ki haba ïadei bad ka jingïatreilang, ka jingpynkup bor ha ka ïoh ka kot bad ka bynta kaba khraw ki samla ban tei ïa ka ri baroh kawei.
Haba kren lamphang u Biswadeep Gupta u la batai ïa ka jingangnud jong ka NEIR, ha ryngkat bad ki jingïalap ki ban dang wan, ki kam halor ki kolshor, bad ki prokram ba shabar kiba buh thong halor ka jingïalong kawei bad ïatreilang hapdeng ki jylla kane ka thaiñ shatei lammihngi.
Ha kane ka janmiet ki la don ruh ki prokram kolshor bapher bapher bad na ka liang u K. Bobin na Imphal u la rwai ïa ka theme song ka NEIR nalor kiwei kiwei pat ki prokram.
Ka jingthmu ban pynlong ïa ka North East Integration Rally, ha u bnai Kyllalyngkot 2026, ka long ban pynïatylli, ka jingïasam ïa ki riti dustur bad kiwei kiwei ki jingangnud kiba donkam ha kane ka thaiñ.