Shillong, Nailur 22: U Myntri ka Tnad Informmation & Public Relation u Bah Lahkmen Rymbui ula rai ban pynkylla ïa ka rukom treikam jong ka Directorate of Information & Public Realation (DIPR) ba kan long ka tnad kaba im bad ba treikam bha.
Halor kane ha ka sngi ba dang shimti ïa ka shuki kum u Myntri, u Bah Rymbui ula lum ïa ka jingïalang bad ki Ophisar ka DIPR ban bishar bniah ïa ka rukom treikam jong ka tnat bad ban ïasyllok ruh halor ki jingthmu ki rukom treikam ha ki sngi ban wan.
Haba kren sha ki lad pathai khubor hadien ka jingïalang ha ka sngi Nyngkong, u Bah Rymbui ula ñiew ïa ka tnat DIPR kum ka tnad ba “ïohthiah lyngngai” ha kane ka juk kor digital, haba ban jur ïa ka jingdonkam ban pynkhie im ïa ka.
U la ong, “Ha kane ka juk ki social media bad ki jingtip kiba sted, ka long kum ka tnad ba ïohthiah lyngngai. Kumta, nga kwah ban pynlong ïa ka, ka tnat kaba im.”
“Phi tip ka DIPR ka dei ka tnat ba kongsan bha, ka ban pynsaphriang bad kaba pyntip sha ki paidbah halor ki policy jong ka Sorkar, kiei ki jingïarap bad kiwei ki jingjop jong ka Sorkar hynrei la ïohi ba watla ki phah ïa ki jingtip, hynrei ym ha la ka jong ka website, ha la ka jong ka social media page,” u la ong.
U Myntri u la bthah ïa ki ophisar ban pynlong ïa ka DIPR ka tnad kaba im ha kaba ki paidbah ki lah ban ïoh ïa ki jingtip kiba shisha.
“Kumta, nga la bthah ïa ki ba ngin sa ïashong jingïalang biang bad pynlong ïa kane ka tnat kum ka tnat kaba im ha kaba ki paidbah kin lah ban ïoh ïa ki jingtip ba shisha napoh ka tnat,” ula ong.
