Sohra, Jymmang 03: Ka kynhun jong ka Sohra Area Development Council (SADC) kaba kynthup ïa ki riew Rangbah, Riewkynthei, Samla jong ka thain Sohra hynnin ka sngi ka la ïakynduh ia u Symbud Myntri Rangbah jong ka jylla Bah Prestone Tynsong ha Circuit House Sohra ban ïakren ia ki kam kiba iadei bad ka roi ka par jong ka thaiñ Sohra. Ïa ka kynhun la ïalam da u bah Banlam Lyngdoh iba long u President ka seng bad Samla Wandajiedlang Nonglait , Secretry ka seng. Ia ïadonlang ruh ki Adviser ka kynhun bah Alan West Kharkongor bad Father James Manni.
Ha katei ka jingiakynduh ka kynhun ka la pynpaw ïa ka jingeh kaba khraw halor ka jinglip bording khah khah ha Sohra kaba la ktah bha ïa ka jingpyniaid ïa ka kam shang pyrthei ha kaba wat ki Generator Set kiba la buh kyrpang ban bynrap ïa ka jinglip ding elektrik ruh kim lah shan shuh bad sniew noh na ka jinglip elektrik kaba bun sngi bun kynta. Kane ka la wanrah ïa ka jingthnum na ka liang ki nongsghang pyrthei kiba sah ha Sohra kiba lyngngoh ba balei ka sorkar kam phai khmat bad leh eiei halor kane ka mat. Ki la kyrpad ruh ia u Symbud Myntri Rangbah ban pynkhlaiñ shuh shuh ïa ka Office jong ka MeCL ha Sohra da kaba thungkam shuh bad ban pynbiang ïa ki tiar ki tar katkum ka jingdawa na ka por sha ka por. Ki la ong ruh ba k jinglip light khah khah ka ktah ruh ia ki samla pule kiba la ud la nam na ka por sha ka por.
Ka kynhun ka la pyntip ruh sha u Symbud Myntri ba ka jingsiang rong ïa ka surok Naduh Umtyngar haduh Saitsopen ka long ka bym ïaid beit ha kaba ka bynta naduh Mawjrong haduh Laitryngew bad naduh Sderkariah haduh lad ïew Sohra haduh ha kine ki sngi ym shym pat siang satia. Shuh shuh ka kynhun la la kyrpad ïa u Bah Prestone ban leh eiei noh ha kaba iadei bad ka Surok Sohra haduh Daithlen kaba la jot rathai bad kaba long ka jinglehraiñ naba da ki spah ngut ki Tourist Ki iaid na kane ka surok man ka sngi. Shuh shuh la pynsngew ha utei u Myntri Sorkar jylla ia ka jignsahteng jong ka jingpyntrei biang ia ka MCCL kaba long ka jingduh jingkyrmen kaba khraw jong ki paidbah ka thain Sohra
Na ka liang jong u Symbud Myntri Rangbah u la kubur ba ki mat kiba la rah da ka SADC ki long kiba donkam bad u la kular ba un sa shimkhia noh wut wut khlem pynsah teng. U la iathuh ba ha kaba ïadei bad ka surok Sohra ka sorkar ka thmu ban pynkylla noh ïa ka sha ka National Highway naduh Umtyngar haduh Shella bad u kyrmen ba ka sorkar India kan sa sngap ia ka jingai jingmut jong ka sorkar jylla. Ha kaba iadei bad ka MCCL u la ïathuh ba mynta la don haduh 3 tylli ki Company kiba la kloi ban iashim bynta ha ka joint Venture bad na ka liang ka sorkar mynta ka dang pule bniah ia ki kot ki sla kiba iadei bad ki Company khnang ba shen yn lah ban shim ia ka rai la yn jied ïano.
U la ong ruh un sa khot ia ki officer jong ka tnat PWD ban iapyrkkhat kyrkieh ha kaba iadei bad ka surok Sohra-Dainthlen.
Kane ka long katkum ka Kyrwoh ba la phah da u Bah Wandajied Nonglait, Secretary ka SADC.
