Nongpoh, Naiwieng 09: Ka Tamasa Amur Falcon Festival 2024 bala pynlong da ka Eastern Ri-Bhoi Tourism and Environment Development (ERTED) haka jingïatreilang bad ka Tyrso Valley Wildlife Protection Society kaba la sdang naduh ka 7 tarik mynta u bnai kala poi noh sha kaba kut hapdeng ka jingiphuh iphieng ryngkat ka jingïakop Miss bad Mr. Amur Falcon 2024.
Kum ban shu kdew hangne ba ka jingthmu jong ka ERTED ban pynlong ïa katei ka tamasa ka long ban pynpaw pyrthei ïaki jait sim kbeit bala tip kum ki Amur Falcon kiba ju wan man u snem haki bnai Risaw haka thaiñ Tyrso bad Umru ha Ri-Bhoi District bad kumjuh ruh ban pynphriang ïaka khubor ban ïada ïaki bad ka jingwan jong kitei ki jait sim da ki lakh tylli kala pynlong ïakiba bun ki paidbah ban leit sakhi ïa kitei ki jait sim kiba ju her haka por janmiet bad mynstep.
Nalor ka jingwan shim bynta jong ki nongrwai bapher bapher ha katei ka tamasa la pynshongshit ruh da ka jingïakop Miss bad Mr Amur Falcon 2024 bala shim bynta ruh da ki khun samla naka thaiñ Eastern Ri-Bhoi bad ha katei ka jingïakop ka samla Deiphibanri Mynsong bad u Samla Pynthymmai Sylliang kila ioh ban rah ïaka nam Miss bad Mr Amur Falcon 2024.
Naka liang u Bah Alos Nongpoh General Secretary ka TVWPS u la ong ba mynta u snem ka seng kala treilang bad ka ERTED ban pynlong ïa katei tamasa ba 3 sngi lynter kaba la sdang naduh ka 7 haduh 9 tarik da ka jingthmu ban pynphriang ka khubor halor kitei ki jait sim kiba ju wan ban buhai shnong shisien shisnem bad khamtam ban ïada ïaki naka jingpyniap pathar kumba katei ka thaiñ mynta ka paw da ka jingdon kitei ki jait sim bad lehse lada ka sorkar kan shimkhia kan kyntiew ruh ïaka ioh ka kot ki paidbah lyngba ka kam jngohkai pyrthei.
