Ka dei tang ka jingsngewthuh bakla halor ka Mission Educational Rehabilitation: Chancellor USTM

Nongpoh, Naitung 30: U Mahbubul Hoque mynta ka sngi u la pynshai paidbah hadien ka jingsaphriang jong ka thoh kaba u la thoh haki rynsan social media halor ka Mission Educational Rehabilitation ka thong jong ka USTM bad ERDF ban ai ka jingpule ei sha kito ki khynnah kiba don sap bad kiba mad jingeh naka jingkyndang ka sorkar Assam.
Haba kren sha ki lad pathai khubor mynta ka janmiet u Chancellor ka USTM u la pynshai ba kane ka dei tang ka jingsngewthuh bakla bad ka jingïalam bakla jongno re jongno kumba katei ka skulbah ka dei kaba shah kynthah haki briew ba heh khamtam naka jylla Assam hadien ba katei ka skul bah ka ioh ka jingkyrshan na kiba bun ki liang bad ka jingnang kiew shaphrang jong ka.
U la ong ruh katei ka jingthoh ka dei kaba u la thoh haka por ba u dang shong ha kad liengsuiñ bad ka jingpdiang ïaki khynnah ban ioh ïaka jingpule ba khlem siew kam dei shuh kaba dang thymmai hynrei kaba naduh ki snem bala dep bad katei ka jingthoh jong u ka dei tang naka bynta ki khynnah rit bad bun nakila ïaroh ïa kane ka sienjam jong ka USTM, hynrei kynsan kynsan la don kiba ïalam bakla namar ka jingthmu jong ka USTM ka long ban jied tang ïaki khynnah kiba dei hok ban ioh namar baroh kiba shah kyndang haka Assam kim dei ki nong Bangladesh bad ka skulbah USTM kam don jaka ban pdiang ne ban ai jaka rieh ïaki hynrei ban shim tang ki khynnah kiba dei hok ban ioh bad ban ïaid katkum ki kot ki sla ban ai ka jingpule ei ha ka skul kaba don haka jylla Assam ym haka jylla Meghalaya.
U la ong ruh ba baroh ki tip ba ka jylla Assam mynta ka don hapdeng ka thma ban kyndang naphang ïa kiba sah beaiñ haki jaka bym dei bad baroh naki kim dei ki nong Bangladesh ki don ruh ki bym don ïing don sem bad jaka puta kiba shu sah haki jaka sorkar bad ka jingthmu ka jong u ban ai ka jingpule ei ïaki khynnah lyngba ka Mission Educational Rehabilitation ka long ban ïaid katkum ka lynti ym baroh kin ioh ïa katei ka bhah namar ki don shibun ki khynnah kiban shem lanot na katei ka jingkyndang ka Assam bad kiba donkam ka jingïarap khamtam ka pule puthi namar kam don kata ka jingthmu ban ai jaka rieh ïaki nong Bangladesh kumba la pynsngewthuh bakla sha ki paidbah.
U la ong ruh ba ka skukbah USTM kala kylla long langkñia haki nongïalam saiñpyrthei kiba pyrshang ban leh politik lyngba ki jaka pule, namar ki iohi ba kane ka skulbah ka kiew shaphrang katba nang mih ki sngi bad bun ki khynnah ki pyndep bad pass bha haki eksam bapher bapher.