Ka dei tang ka jingpynjah burom u Sordar Patharkhmah ïa u MLA
U MLA u khlem lum sop sop ïa ki kot ki sla halor ka kam pynbeit pud bad ka Dorbar Hima kam lah ban shu ai khlem da shong meeting, pynshai ki nongïalam Hima bad Sordar
Nongpoh, Nailur 06: Ki nongïalam Hima jong ka Jirang bad kumjuh ruh ki Sordar Shnong naduh ki nongïalam shnong na katei ka thaiñ hapoh ka shatri lyngba ka sur u Paidbah Western Ri-Bhoi mynta ka sngi kila mih shakhmat ban pynshai halor ka jingshah kynnoh ba u MLA ka Jirang u leit ban lum sop sop ïaki kot ki sla naki Hima bad ki Raid ha kaba ïadei bad ka jingpynbeit ïa u pud u sam haka thaiñ Jirang Constituency.
Haba kren sha ki lad pathai khubor mynta ka sngi u Bah Langester Wahlang u ba dei ruh u Assistant Secretary jong ka ophis Hima Jirang u la ong ba katei ka jingkynnoh jong u Bah Najim Kharmalki ka long ka bym don nongrim bad ka dei tang ka jingpynjah burom ïa u MLA ka Jirang ha kaba u la pynshai ba ka ophis jong ka Hima Jirang kam lah ban ban aiti ïaki kot ki sla khlem da shong meeting, bad khlem da pynrung hapoh register jong ka Hima, bad naka liang ka Hima kam shym la don ka jingai sop sop ïaki kot ki sla kumba la kynnoh.
Naka liang ka sur u paidbah Western Ri-Bhoi, naduh u Bah Lestar Nongphlang Ex Sordar Umrit ba dei ruh u Adviser ka Western Ri-Bhoi Dorbar & Social Welfare Organisation, U Bah Esman Lyngdoh Sordar ka Umkynsier, Bah Siewdor Syngkli Sordar Mawskei Them, Spylot Lyngdoh EM Hima Jirang, Liskonraw Nongtri, ex-president Women Social Welfare Patharkhmah kila pynpaw ba katei ka jingkren jong u Bah Najim Kharmalki ka dei tang ka jingpynjah burom ïa u MLA, u ba kum ki paidbah kim pat ioh MLA haduh mynta ba trei shitom bad ban wanrah ki jingkylla haka thaiñ Jirang kum u u Bah Sosthenes Sohtun.