Shillong, Rymphang 01 : U Myntri Rangbah ka Jylla, Conrad K Sangma u la pdiang sngewbha bad ai ka jingïaroh ïa ka Mangtyngka jong ka Sorkar Pdeng da kaba ong ba kane ka Mangtyngka kadei kaba ïohi jngai bad kaba thew kyrpang ban kyntiew ïa ka thaiñ shatei lam-mihngi jong ka Ri.
“Ka jingai khublei sngewnguh ïa ka Myntri Pla Tyngka jong ka Sorkar Pdeng, ka Nirmala Sitharaman, kaba la wanrah biang sa shisien ïa ka mang tyngka kaba pura bad kaba ïohi jngai kaba buh ruh ïa ka nongrim kaba khlain bha ban wanrah ïa ka roi ka pa kaba skhem,” ong u Myntri Rangbah ha ka rynsan social media.
Ha kajuh ka por, u la ai ruh ka jingïaroh halor ka jingmang kyrpang na ka bynta ka thain shatei lam-mihngi jong ka ri bad ong ba kane kadei ka jingthrang jong ka sorkar ban pynkylla ïa kane ka thain sha ka thain kaba kiew artet ha ka roi ka pa.
“Nga pynpaw ïa ka jingsngewnguh kaba khraw ïa ka bad ïa u Myntri Rangbahduh ba ïohi jngai, u Narendra Modi na ka bynta ka jingshimkhia jong ki ban peit ba ka synshar khadar kan dei da kaba pynshong nongrim ha ki paidbah bad ka jingroi jingpa jong ka ri kaba long salonsar lang ïa baroh,” la bynrap biang u Myntri Rangbah.
