Tura, Iaiong 27 : Ka Garo National Council (GNC) ka la pynpaw hakhmat u Myntri Rangbah ka jylla u Conrad K Sangma ba ka jingpyntreikam jongka NEHU da ka Central University Entrance Test (CUET) ban ïoh rung College ban bteng ki jingpule ïa ka BA, BSc bad BCom ka dei ka jingthom beiñ ïa ki samla pule Riewlum nalor ba la buh bhah kyrpang tang 7.5 % ïa ki samla pule riewlum ha baroh kawei ka NEHU.
Kane ka jingbuh bhah kyrpang tang 7.5 % kam dei tang ka jingthom beiñ ïa ki paid riewlum hynrei ka dei ruh pyrshah ïaka Reservation Policy jongka jylla Meghalaya kaba la pyntreikam naduh u snem 1972.
Kane ka jingpyntreikam ïa ka CUET kan pynhiar ïa ka jingnang jingstad hapoh ka jylla namar kin sa don tang khyndiat ngut ki samla pule ki ban ïoh ban bteng ïa ki jingpule bad ka long kum ka jingïuhroit ïa ki hok jong ki samla pule ST, SC, OBC, PWD, EWS. Kumta dei ban dawa ban pyndam mardor ïa kane ka CUET. Ka jingmih ka CUET kan sa pynïoh kabu ïa ki briew ba kin seng ïa ki jaka ai jinghikai pyntbit ban mih kum ki tit bad kane kam dei satia kaba i tynnad ban ïohi ba kan jia hapoh ka jylla. Kumba long mynta la bishar tang da ka Percentage ïa ka jingpass ki samla pule bad kane ruh ka la biang bad ym donkam ïa kane ka CUET.
Kumta na ka liang ka GNC ka kyntu jur ïa u myntri rangbah ba un shim khia ïa kane ka kam ban ïakren bad ki bor ka sorkar pdeng bad khamtam ïa ka tnad Human Resource Development (HRD) ban pynsangeh noh ïa kane ka CUET ha ka jylla namar kane kan ktah jur ïa ka jylla ha baroh ki liang. Kane ka long kat kum ka jingpyllait khubor na ka GNC lyngba u Nongïalam jongka uba dei ruh u MDC u Nikman C Marak.
