Shillong, Naitung, 02: U nongïalam ka Congress ha kane ka jylla u ma Vincent H Pala ula ong mynta ka sngi Thohdieng ba ka Congress kan sei da ki kyrtong ki bym pat don ka jingthoh bria bad lait na ka jingbamsap ha ka election MLA 2023.
U la ong ba ka Congress ka don ka jingkyrmen ban jop- bun namar ki kyrtong jongka ki dei kiba dang thymmai suda bad baroh ki dei ki bym pat donkti ha ki kam bamsap.
U la ong ba ka Congress ka dei tang ma ka kaba sei da ki kyrtong kiba dang samla bad kiba dang khuid dang suba la ka dei hangne ha Khasi bad Jaintia ne ha Garo Hills ruh. Nga tharai tang ka party jong ngi ka ban ïoh ban sei da ki kyrtong kiba la tbit ka kyrdan jingpule bad kiba kloi ban aiti ha ka jingshakri ïa ki paidbah. Ka thong jong ngi ka long ban ïakhun na baroh 60 tylli ki constituency. U la ong sa tang khyndiat tylli eh ki constituency ki bym pat dep seng biang ïa ki Block Congress Committee.
“ Hooid ngim pat pynbna ïaki kyrtong tangba ki la don kiba la dep jied lypa bad kiba la nang trei ïa ka kam. ïa ki kyrtong yn sa pynbna tang shu dep pynbna ka election commission ïa ka tarik jongka election.
U la ïathuh ba ki la don bun kiba kwah ban ïakhun na ka Congress na man la ki constituency. U la ïathuh ba ka party kan sa sei da kiba thymmai na Laitumkhrah, Nongthymmai bad Ri Bhoi ruh. U laong ba ki MLA ki lah ban phet na ka party hynrei ki nongkyrshan kin ym phet da lei lei ruh. U la ong wat la kiba bun ki kynnoh da kumne kumtai hynrei ki nongkyrshan kiba ieit ïa ka Congress da lei lei ruh kin ym kynriah na ka party.
U la ong ruh ba ka AITC kam don jingma ei ei ruh em ïa ka Congress ha ka election MLA 2023. U la ong ha kaba sdang bun kiba la rung sha ka TMC hynrei sa peit kin dang don bun ki ban phet na katei ka party. “ Nga tharai ki la rung sha ka TMC ryngkat ki jingkular ban ïoh ei ei hynrei haba ym ioh ei ei mynta ki la khih ban mih noh bad ki paidbah kin sa ïohi shwa ka election MLA aiu kan jia ïa ka TMC ha Meghalaya, U la ong wat tang ha ka jingwan jong u Abhishek ruh ki la don saw ngut ki MLA ka TMC Kiba khlem poi sha ka jingïalang. Ki nongïalam jong ngi ha kine ki sngi ki khlem rung sa ka sain pyrthei ban shakri ïa ki paidbah hynrei ki rung ban jop bad myntoi ïa lade shimet” ong u ma Pala. U la ong wat na ka NPP ruh kin sa don ki ban phet shwa ka election.
