Ka Congress kam riew spah ha ka jingdon pisa, hynrei riew spah ha ka mynsiem jong ka jingïatreilang: Ma Pala

Mawkyrwat, ‘Naiwieng 20: U President ka Meghalaya Pradesh Congress Committee (MPCC), u Ma Vincent H. Pala uba dei ruh u MP ka Lok Sabha jong ka Shillong Constituency haba ka jingkren ha ka jingïalang jong ka party congress ha Dorbar Hall Rangthong, South West Khasi Hills District u la ong, “Ka congress kam dei kaba ai pisa bad kam dei hi ruh kaba riew spah ha ka jingdon pisa hynrei ka riew spah ha ka mynsiem jong ka jingïatreilang bad bun bah ki paidbah ki ju ai ka jingkyrshan namar ka ai ïa ka jingshynshar kaba paka ha kaba ym don mano mano ba lah ban thied ïa kata.
Shuh shuh u la ong ruh ba wat ong ba ka congress ka duk, hynrei ka long kaba riew spah ha kiba bun ki bynta. Namarkata, u la kynthoh ba kane ka sorkar ba mynta ka shu im tang ban khrong bad kam salia wat ki long kiba duk ne kiba riew spah. U la ïathuh ruh ba haduh 13,500 klur tyngka la dep ban mang hapoh ka tnad PWD hynrei kiba ïoh bynta ban pyntrei ne ki contractor ki dei tang na ki 2 ne 3 ïing. Kumta, da kane ka lynti kiba riew spah ki lah nangriew spah bad kiba duk pat ki nangduk bad kane mynta ka paw shai ba kam dei shuh ka jingsynshar paidbah.
Namarkata, ula buh ka jingkyrpad bad ai mynsiem na ka bynta ki nongtrei jong ka party ba kim dei ban noh mynsiem hynrei ba kin long kiba trei shitom khlem jing-ar-tatien bad kin ai ruh ka jingïatreilang bad ka kyrtong namar ka jingïaleh elekshon kam dei tang jong ka kong Victorealness marwei hynrei ka dei jong baroh ki nongkyrshan ka party.
Haba kren halor ka khusnam ba ka kong Victorealness Syiemlieh ka la ïoh ka “National Florescence Nightingale Award 2021”, u Ma Pala u la ong ba kam dei ka khusnam ba ma ka riew spah hynrei ka dei ba ka la ai ïa kata ka jingshakri kaba paka ïa ki paidbah jong ka dong ka thaiñ baroh kawei ha ka liang ka koit ka khiah.
Ha kajuh hi ka sngi ka Ranikor Block Congress Committee (RBCC) lyngba ka jingïadonlang jong u Ma Vincent H. Pala, President Meghalaya Pradesh Congress Committee (MPCC) ki la ïoh ban pynskhem ïa ka kyrteng jong ka kong Victorealness Syiemlieh ba kan mihkhmat kum ka kyrtong na ka Indian National Congress (INC) napoh jong ka Ranikor Constituency ha kaba ka jingïaleh mynta ka la sdang ban pynurlong ïa ka jingkwah jong kiba bun ki paidbah khnang ba ka jingthmu ban poi sha ka thong kan long kaba jop.
Ha kane ka jingïalang na ka liang ka Ranikor Block Congress Committee Mahila bad ka District Congress Committee ki la ïoh ban pynkup burom ïa ka kong Victorealness Syiemlieh.
Ïa ka jingïalang ha kane ka sngi la pynïaid da u bah Y. Khardewsaw, President ka Ranikor Block Congress Committee (RBCC) bad la ïoh ki jingkren lyngkot na ka kong Victorealness Syiemlieh ka kyrtong na ka INC Ranikor Constituency ha ryngkat ka jingïadon lang ruh u bah P.N Syiem, MDC na ka Pynthor-umkhrah Constituency bad kum u nongïalam ka liang pyrshah hapoh ka KHADC, u bah Carnes Sohshang, MDC ka Mawkyrwat Constituency, bah Ronie V. Lyngdoh, MDC ka Mylliem Constituency lem bad u Myntri ka Shnong Rangthong, u bah Kitborlang Nongrem bad ka jingsakhi lang da ki spah ngut ki paidbah kiba long ki nongkyrshan jong ka Congress.