Ka Congress kam don jingwit ban ïatrei lang bad kiwei ki Party lait noh ïa ka BJP: Vincent Pala
![](https://mawphor.com/wp-content/uploads/2023/07/pala.jpg)
Shillong, Risaw, 19: U President ka Meghalaya Pradesh Congress Committee (MPCC) Bah Vincent H. Pala ha ka sngi Palei u la ong ba ka Congress kam don jingwit ban ïatreilang bad kino kino ki seng saiñpyrthei hynrei lait noh bad ka Bharatiya Janata Party (BJP).
U Bah Pala u la pynpaw ïa kane halor ka jingkylli ba ka Congress ka la ai jingkyrshan ïa ka Executive Committee (EC) ha Khasi Hills Autonomous District Council (KHADC) ba la ïalam da ka National People’s Party (NPP) watla ka dei ka B-team jong ka BJP. Ïa ka Sorkar MDA ba la ïalam da ka NPP la kyrshan da ka BJP.
Ka NPP ka la pynkylllem ïa ka EC ba la ïalam da ka UDP ha KHADC da ka jingkyrshan jong ka Seng Congress.
“Ki seng saiñpyrthei kin ym pyndonkam tang na kawei ka liang hynrei kin pyndonkam na kiba bun ki liang bad ka jingïatreilang jong ngi ha District Council ka long namarba ki ïashrut pamaki (ki paralok ka MDA-ka UDP bad NPP) bad ngi pyrkhat sani lada ka wan ka jingpynbeit thymmai ïa ka Sixth Schedule bad lada ka NPP ka kyrpad ïa ki nongïalam jong ngi ngi pyrkhat balei ngin shu ieh ïa la ka jong ka ‘jaidbynriew’, ngi ruh ngi don ka hok ban ai ïa ki jingsngew halor ka jingpynbeit thymmai ïa ka Sixth Schedule. Palat ne duna, ki don kumba 6 tylli ki jingpynbeit thymmai kiba kham heh ha ka Sixth Schedule. Dei ban buh jingmut ruh ba ka District Council hi ka dei kaba ïada ïa ka lariti, ka riti ka dustur bad ïa ka thymmei jong ki riewlum ritpaid bad ïa ki jaka ki puta jong ki bad kine ki ishu ha District Council ki ïapher na ki ishu ha ka Jylla, namarkata, ngim don jingwit ban ïatreilang bad kano kano ka seng saiñpyrthei, hynrei lait noh bad ka BJP,” la ong u Bah Pala ha ka jingïakren bad ki lad pathai khubor.
U Bah Pala u la ïathuh ruh ba ka rai ban ai jingkyrshan ïa ka EC ba la ïalam da ka NPP ha KHADC la shim hadien ka jingïasyllok kaba bniah bad ki nongïalam ha Delhi.
“Ki (nongïalam na Delhi) ong ba ngim don jingwit eiei ban ïatreilang bad kiwei kiwei ki seng saiñpyrthei namarba lada ngi ïatreilang bad ki, kam mut ba ngin shah tyllep pat ïa ka saiñpyrkhat jong ki bad ngin ïai bteng ban ïaineh beit bad ka saiñpyrkhat jong ka Congress,” u la ong bad bynrap, “kiwei kii lah ban ong katba ki kwah ban ong hynrei ka jingshisha hi ka long ba ka BJP kam don satia ha District Council bad kaba ar, ngi hap ban buh shwa ïa ki mat ki jura jong ka jaidbynriew hakhmat. Ïa ka District Council la pynkha hapoh ka Khyrnit Bahynriew. Lada ngi shu ieh lut tang ha ki, ka UDP bad ka NPP kin ym pyrkhat than shaphang kane hynrei ngi hap ban pyrkhat sani bha ïa kane ka kam kaba khia.”
Shuh shuh, une u MP ka Congress na Shillong u la pyntip ba ïa ka Bill ba la pynbeit thymmai jong ka Sixth Schedule la wanrah ha Rajya Sabha ha u snem 2019.
“Nangtei kin sa phah ïa kane ka kam sha ka Committee ka ban sa leit jurip sha baroh ki Jylla kiba pyntreikam ïa ka Sixth Schedule. Ka Sorkar Jylla ka ladep ai ïa ki jingai jingmut. Mynta, ka dei pat ka bynta jong ki ban pynrung ïa ki jingai jingmut jong ka Jylla lane jong ka District Councils (hynrei lym kumta) ngam tharai ba yn dang sah eiei shuh lait sa tang ban shu pynbeit thymmai ïa ka Sixth Schedule ka ban shim por tang 2-3 sngi (ban pyndep ïa ka kam),” u la ong.
Katkum ka jingong jong u, kaba sah mynta ka long sa tang ban wanrah ïa ka Bill ban ïathir ïatai hapoh ka Parliament.
U Bah Pala u la pynpaw ruh ba katkum ka jingsngewthuh jong u, ka BJP ka kwah ban pynbeit thymmai ïa ka Sixth Schedule kaba treikam ha ki 11 tylli ki ADC ha ka thaiñ Shatei Lammihngi bad kynthup ruh ha ka jylla Meghalaya.
“Kiwei ki jylla ruh ki kwah ïa kane namarba kan plie lynti ban ïoh kham bun ki song pynroi bad ban kyntiew ïa ka jingdon jong ki Seats. Ka Sorkar Meghalaya ka ladep pynpaw ïa ka jingdonkam ban pynbeit thymmai ïa ka Sixth Schedule,” u la bynrap.