Shillong, Nohprah 01 : U President ka Congress, u MA Vincent H Pala ha ka sngi Nyngkong u la ong ba ka jingïathut hapdeng u Saleng A Sangma bad u Mukul M Sangma kam dei satia kaba katta katta bad ong ruh ba kane kadei tang ka kam hapdeng ki arngut ki nongïalam.
“Ka kam politik kadei kaba phylla bha ym ju don paralok ba neh bad ym ju don nongshuh ba neh,” ong u Bah Pala haba kren bad ki lad pathai khubor ha ka sngi Nyngkong. Ha kajuh ka por u la banjur ba ka seng Congress ka plie lad ïa baroh bad ka pdiang sngewbha ïa baroh, kynthup ïa u Mukul Sangma, lada u rai ban wanphai biang.
U Pala u la kdew ruh ba u Dr. Mukul u dei u nongïalam uba la ih bha ha ka sainpyrthei ha ka jylla bad ruh ha ka jingshemphang. Tangba u la pynpaw na kaei kaba u ju kren bunsien ka paw ba um kwah shuh ban wanphai biang sha ka party.
“Nga tharai ba u sngewthuh ïa la ka jong ka kyrdan,” ong u Bah Pala da kaba kdew ba ka rai jong u Dr. Mukul kadei kaba shai.
Kane ka jingkren jong u President ka Congress ka wan hadien ka jingkynthoh halor ka lawei jong u Mukul, ha kaba ki khubor ki pynpaw ba u dang wad ki lad ki lynti, kynthup ban rung biang sha ka Congress lane ban thaw ïa ka party thaiñ kaba thymmai.
Na ka liang u Bah Pala u la ban jur ba kano kano ka rai halor ka jingwanphai biang jong u Mukul kan donkam ïa ka jingmynjur shwa na ka All-India Congress Committee (AICC).
